Një 23-vjeçar ka mbetur i plagosur këtë të shtunë në fshatin Zall-Dardhë të Dibrës. Paraprakisht dyshohet se konflikti ka ndodhur mes dy familjeve në këtë fshat dhe shkak janë bërë motivet e pronësisë.
I riu, i identifikuar me iniciale E.Ç, ka marrë plagë me armë zjarri në kokë. Ai është transportuar drejt spitalit të Traumës në Tiranë dhe ndodhet në gjendje të rëndë.
Burime thonë se kanë qenë tre vëllezër, të cilët kanë shkuar në shtëpinë e 23-vjeçarit dhe pasi kanë debatuar fillimisht verbalisht, njëri prej tyre ka nxjerrë armën dhe ka qëlluar.
Policia u vu në kërkim të tyre dhe pak kohë më vonë kapi autorin e dyshuar të ngjarjes, 25-vjeçarin Rr.K. Ndërkohë vijon puna për kapjen e dy vëllezërve të tjerë, K.K. 35 vjeç dhe A.K, 27 vjeç.
Në vendin e ngjarjes janë sekuestruar 4 gëzhoja dhe 1 plumb i pa plasur. Disa metra më larg është gjetur edhe arma e zjarrit, një automatik, që dyshohet se është përdorur nga autorët.
