Një 24-vjeçar mbeti i plagosur tek Komuna e Parisit . Lorenc Hoxha është jashtë rrezikut për jetën në spital. I riu nga Bulqiza ka postuar një sërë fotosh që tregojnë mjetet luksoze që përdorte.
Ngjarja ka ndodhur në kryqëzimin e “Komunës s ë Parisit”, rreth orës 19:45, duke tronditur zonën dhe shkaktuar panik te dëshmitarët e rastit. Të shtënat e dyanshme mes dy mjeteve në lëvizje kanë shkaktuar plagosjen e Lorenc Hoxhës, 24 vjeç. Fatmirësisht, nga shkëmbimi i breshërive të plumbave nuk u lënduan kalimtarë. Burime policore konfirmuan dje se personi i plagosur në ngjarje ishte 24-vjeçari nga Dibra, Lorenc Hoxha. Atij i është shkaktuar një dëmtim në shpatull dhe në dorë. Pas ngjarjes, Hoxha është dërguar në spital për ndihmë mjekësore. I plagosuri është jashtë rrrezikut për jetën, por autorët ende nuk dihen. Policia nuk ka ende asnjë të dyshuar, por me marrjen e dëshmisë së Hoxhës në spital pritet të zbardhet ngjarja.
“Nga hetimet paraprake ka rezultuar se ka pasur një shkëmbim zjarri midis disa mjeteve, ku për pasojë ka mbetur i plagosur në shpatull shtetasi Lorenc Hoxha, 24 vjeç, i cili ndodhet në spital nën kujdesin e mjekëve”, njoftoi zyrtarisht Policia.
Sipas veprimeve të para hetimore të kryera pranë vendit të ngjarjes, ka rezultuar se i riu Hoxha ka qenë mbrëmë në drejtimin e një mjeti tip “Mercedes Benz”, ngjyrë të bardhë, me targa AA 777 RT. Ky mjet ishte në pronësi të Xh. Hoxhës. Lorenci ka qenë i shoqëruar nga një person tjetër.
Pas të shtënave, ai ka devijuar në një nga rrugicat e lagjes. Aty ata kanë braktisur mjetin të pasiguruar me frenat e dorës dhe është parë të largohet i gjakosur në rrugicat mes pallateve.
Sipas dëshmitarëve pranë vendit të ngjarjes, mjeti ka bërë lëvizje të lirë për shkak të terrenit të pjerrët në drejtim të tunelit të një pallati. Në pjesën e brendshme të tunelit mjeti “Mercedes” është mbështetur në murin anësor, pa u dëmtuar.
