Kuvendi i Shqipërisë ka nisur punimet e seancës plenare së ditës së sotme me një minutë heshtje për viktimat e shkaktuara nga aksidenti i mbrëmshëm në Maqedoni, ku 15 udhëtarë humbën jetën.
I pranishëm në llozhat e Kuvendit është edhe kryetari i Kuvendit të Maqedonisë së Veriut, Talat Xhaferri.
Në fjalën e tij kryeministri Rama tha se: “Pa shqiptarët nuk do kishte Maqedoni të Veriut dhe për Shqipërinë identiteti territorial i Maqedonisë së Veriut janë jo vetëm të pacenueshme por edhe jetike për të sotmen dhe të ardhmen tonë, drejt paqes e stabilitetit. Roli ynë në këtë proces historik ka qenë rol mbështetës jo udhëheqës. Situata e qetë i dedikohet në radhë të parë lidershipit shqiptar atje dhe kryeministrit vizionar Zoran Zaev të cilin e përshëndes”, deklaroi Rama.
Menjëherë pasi kryeministri Edi Rama, që përshëndeti anëtarësimin e Maqedonisë së Veriut në NATO, fjalën e ka marrë kryetari i Partisë Demokratike, Lulzim Basha.
Basha ndërsa shprehu ngushëllimet për humbjen e jetëve në aksidentin tragjik të mbrëmshëm, dhe përshëndeti rezultatet e Maqedonisë në luftën ndaj korrupsionit dhe krimit, u tregua shumë i ashpër në fjalën e tij me Ramën duke e quajtur “kryehajdut që vjedh vota, që e ka kthyer Shqipërinë në një tufë oligarkësh që nuk kanë lidhje me fatin e qytetarëve.”
“Ky është morti i dytë. Morti i rënies së shtetit ligjor në Shqipëri. Z. Xhaferri, ju jeni i pranishëm në një sallë që është e mbushur me hajdutë që punojnë kundër vullnetit të qytetarëve dhe që janë kapur nga bandat e organizuara, një qeveri dhe ka braktisur vullnetin europian të vendit. Të shtunën do të jetë protesta më e madhe opozitare në vend. Përgjimet e Zërit të Amerikës treguan vjedhjet e votave. Kjo qeveri vodhi qytetarët, studentë, teatrin. Zgjidhja është një qeveri tranzitore.”, tha Basha.
E menjëhershme ka qenë edhe ndërhyrja e Ramës, që duke i kërkuar falje z. Talat Xhafërri, tha se; “Ju këkoj ndjesë për fëmiun që foli se nuk e di ç’foli”/ Dl
