Gjykata e Apelit Penal prej tre anëtarësh ka dënuar me 16 vjet e 6 muaj burg27-vjeçarin shqiptar, i cili përplasi për vdekje 21-vjeçaren Emmanuela, në rrugën Egnatia, në Selanik, në nëntorin e vitit të shkuar.
Gjykata e shpalli njëzëri fajtor 27-vjeçarin me origjinë shqiptare për drejtim mjeti të rrezikshëm me pasojë vdekjen, largim nga vendi i aksidentit dhe drejtim mjeti pa patentë. Më herët gjykata hodhi poshtë kërkesën e mbrojtjes për ndryshimin e akuzës në vrasje.
Ankimi i të pandehurit është vendosur që të mos ketë efekt pezullues në ekzekutimin e dënimit dhe kështu ai kthehet në burg.
“Kalofshi mirë”, thirri nëna e Emës pasi dëgjoi vendimin e gjykatës.
“Sot është përvjetori i varrimit të Emmanuelës dhe sot është edhe vendimi i dënimit të njeriut që e vrau”, tha nëna e 21-vjeçares, pas dënimit të gjykatës për shoferin 27-vjeçar.
“Sot Emmanuela u shfajësua”, theksoi Kelly Kampaki, duke shtuar se “vrasësi do të bëj 16 vite e 6 muaj burg. Drejtësia bëri atë që duhej të bënte”.
Ndërsa babai i 21-vjeçares Ema u foli gazetarëve duke mbajtur qirinjtë që studentja fatkeqe do t’i merrte me tortën, atë natë fatale, me shoqen e saj që kishte ditëlindjen.
“Vendimi sigurisht që nuk e kthen fëmijën tonë. Por ne mendojmë se gjykata ka gjykuar, vendosur dhe dënuar vrasësin e fëmijës tonë dhe në të njëjtën kohë u dërgon një mesazh të gjithë të tjerëve që janë atje jashtë që mendojnë se rruga është një pistë garash”, tha ai./Opinion.al
