Emilio Zema është 20-vjeçari, i cili aksidentoi me motor tre ditë më parë turisten, 33-vjeçare nga Nepali, në qytetin e Beratit.
Ditën e sotme, Gjykata e Shkallës së Parë të Jurisdiksionit të Përgjithshëm Berat ka vendosur ndaj tij masën e sigurisë ‘arrest shtëpie’.
Masa e sigurisë është kryer në ambientet e Spitalit Rajonal Berat, ku EmilIo Zema është i shtruar dhe nën kujdesin e mjekëve, pas plagëve të marra nga aksidenti.
20-vjeçari ka rezultuar se ishte duke qarkulluar me shpejtësi jashtë normave të lejuara, ku turistja shtetasja S.Th, 33-vjeçe, ka rezultuar se i ka prerë rrugën motorit në përpjekje për të kaluar në anën tjetër të rrugës, pa qenë në vijat e bardha.
Prokurori Eni Culli pasi pa dinamikën e ngjarjes dhe pasi vlerësoi edhe dëmtimet e marra nga të dyja palët, i ka kërkuar gjykatës vlerësim të ligjshëm të arrestimit të tij për veprën penale “Shkelje të rregullave të qarkullimit rrugor” dhe caktimin e masës së sigurisë “arrest shtëpie”.
Pasi ka dëgjuar organin e akuzës, si dhe pretendimet e avokatit mbrojtës të 20-vjeçarit, gjyqtarja Lumturi Zhupa, ka vlerësuar “të ligjshëm” arrestimin e shtetasit Emilio Zema dhe ka caktuar për të masën e sigurisë “arrest shtëpie”.
