Drejtori i Policisë së Tiranës, Kastriot Skënderaj u shkarkua mbrëmjen e së hënës, pas tensioneve që u krijuan mes përmbarimit dhe banorëve të një ndërtese, në lidhje me një çëshje pronësie.
Por përpara këtij vendimi, Kastriot Skënderaj ka firmosur një tender për “ndërtimin e objektit multifunksional në Drejtorinë Vendore të Policisë Tiranë”.Rreth 11 milionë lekë të reja do të shpenzohen për zyra, bllok shërbimesh, palestër dhe salla për pritjen e qytetarëve.
“Në Drejtorinë Vendore të policisë së Tiranës del si domosdoshmëri në plotësimin e krijimit të mjediseve në shërbim të funksionalitetit të institucionit, pasi ambientet ekzistuese janë tejet të amortizuara dhe nuk plotësojnë nevojat për hapësirë dhe për ushtrim të aktivitetit të kësaj strukture”, argumenton ish drejtori i Policisë.
Sipas kërkesave, disa nga objektet e Drejtorisë së Tiranës nga 2 kate kërkohen të bëhen me 4-5 kate. Për të bindur drejtuesit më sipër, Kastriot Skënderaj shoqëronte argumentet e tij për këtë rikonstruksion dhe me foto, nga ku dallohet çarja e mureve të Drejtorisë së Policisë së Tiranës.
Në fakt kjo ndërtesë u rikonstruktua përpara 4 vitesh, në atë kohë ministër i Brendshëm ishte Saimir Tahiri. Në atë kohë u tha se rikonstruksioni nuk i kushtoi asnjë lekë buxhetit të shtetit pasi i bë nga donacionet./ Opinion.al
