Kreu i Partisë Demokratike, Sali Berisha ka deklaruar ditën e sotme se votat e diasporës u shtetëzuan.
Përmes një konference për shtyp nga ambientet e selisë blu, Berisha vijoi me denoncimet për zgjedhjet e 11 majit, ku theksoi se përmes legalizimeve, u blenë vota të shumta.
“Vota e diasporës e cila siç e dini ju, është shtetëzuar. Natyrisht ndërhyrjet brutale në proceset e farsës elektorale ishin të shumëllojta. E një herë, në çdo vend e shtet, një proces zgjedhor asgjësohet dhe shndërrohet në farsë elektorale kur shteti… kur partia bëhet shtet, e shteti parti. Ky është kushti i të gjitha kushteve për të asgjësuar procesin e drejtë zgjedhor, për ta shndërruar atë në farsë.
Këta kriminelë elektoralë po ndajnë atyre certifikata pronësie, leje legalizimi.
Është vetëm pak ditë para fushatës elektorale. Publikisht!
Natyrisht janë në mbrojtjen e plotë të Altin Troplinit dhe Skapit të partisë.
Në harkun kohor të ndaluar me ligj, në qarqet e vendit u realizuan, në Berat 419 legalizime, në Dibër 123 legalizime, në Durrës 928 legalizime, në Fier 801 legalizime, Gjirokastra 98, Kukësi 124 legalizime, Tirana 1931 legalizime, Vlora 590 dhe Lezha 116.
Në total janë dhënë 6 mijë legalizime. Imagjinoni këto, minimumi 3 gjer në 5 vota, se sa u blenë vetëm me lejet e legalizimit”, tha Berisha.
