Të paktën 27 persona raportohet se kanë humbur jetën nga përmbytjet e shumta dhe rrëshqitjet e dheut që kanë përfshirë Turqinë dy ditët e fundit.
Zyrtarët turq thonë se ekipet e kërkim-shpëtimit kanë gjetur 10 trupa të tjerë të pajetë brenda natës, duke e rritur kështu numrin e të vdekurve.
Përmbytjet goditën provincat bregdetare të Detit të Zi, Bartin, Kastamonu, Sinop dhe Samsun të Mërkurën, duke prishur shtëpi dhe ura dhe duke fshirë makina. Qindra njerëz u shpëtuan me siguri me helikopterë.
Agjencia e Menaxhimit të Fatkeqësive dhe Emergjencave, AFAD, tha se ekipet e shpëtimit gjetën 10 trupa të tjerë në Kastamonu. Ndërkohë, një grua 80-vjeçare u raportua e zhdukur në provincën Bartin.
Më shumë se 170 fshatra ngelen pa energji elektrike dhe dhjetëra rrugë fshatrash u bllokuan.
“Kjo është një fatkeqësi , që nuk është parë në 50 ose 100 vjet, tha ministri i Bujqësisë dhe Pylltarisë Bekir Pakdemirli.
Deri më tani 323 persona janë evakuuar në Bartın, 925 në Kastamonu dhe 472 në provincën Sinop.
Vërshimet dhe zjarret kanë shkatërruar dhjetëra mijëra hektarë të pyjeve. Më shumë se 1,700 persona janë evakuuar nga zonat e prekura, disa me ndihmë të helikopterëve dhe barkave.
