Shqipëria ndodhet në emergjencë për shkak të përmbytjeve të mëdha që përfshinë vendin. Shtëpi, shkolla, rrugë dhe toka bujqësore janë përmbytur në Tiranë, Durrës, Shkodër, Kamëz, Lezhë, Lacc, Fushë-Krujë. Gjithashtu në shumë zona mungon energjia duke bërë të pamundur edhe punën e hidrovoreve dhe pompave.
Në Lezhë janë vënë në gadishmëri edhe Forcat e Ushtrisë. Gjithashtu të gjitha makinat zjarrfikëse janë të terren dhe po ndihmojnë për thirrjen e ujërave sidomos në institucione publike. Situatë tejet kritike paraqitet edhe në autostradën Tiranë-Durrës ku qindra makina mbeten të bllokuara në ujë gjatë gjithë paradites se sotme. Gjithashtu janë dëmtuar shumë edhe bizneset që ndodhen anash autostradës.
Ministria e Brendshme u bën thirrje qytetarëve të evitojnë lëvizjet, pasi reshjet e shiut do të vazhdojnë. Po kështu edhe mësimi është ndërprerë në shumë shkolla të vendit.
Në Tiranë, situata është më e rënduar në zonat rurale, në Zall Bastar dhe Zall Herr, me dëmtimin e disa urave, për shkak të prurjes së jashtëzakonshme të ujit nga përrenjtë dhe lumenjtë. Ka pasur problematika në 2 shkolla, me prezencë uji në oborr.
Situata është kritike në zonën e Bregut të Lumit, i cili ka dalë nga shtrati. Po kështu Ura e Shkozës, Rruga Misto Mame në zonën e Selitës, Don Bosko, janë aktualisht të përmbutura.
Në Durrës dhe Fushë-Krujë, shumë banesa janë tashmë nën ujë dhe po punohet për evakuuimin e banorëve.
Dy grupe shpëtimi me varka dhe mjete të kalueshmërisë së lartë janë në Fushë-Krujë në ndihmë të banorëve për evakuimin e tyre.
Forcat e ushtrisë pritet të ndërhyjnë dhe në Derven pas daljes nga shtati të lumit Zezë dhe në Borizanë. Një situatë e vështirë është dhe të Ura e Brarit në Tufinë, ku kanë mbërritur forcat e ushtrisë për evakuimin e një familjeje e cila është në rrezik përmbytjeje.
Në Shkodër janë dhjetëra hektarë toke nën ujë. është përmbytur edhe Ura e Dedë Gjon Lulit.Ndërkohë që uji i është afruar Harkut të Bërdicës
Lumi Drin, në territorin e Zadrimes është në pikën kritike dhe rrezikon të dalë nga shtrati duke vënë në rrezik qindra banorë të fshatrave të Lezhës.
Në Lezhë janë aktualisht të përmbytura: Bregu i Matit (Spiten, Markatomaj, Tresh). Në Barbulloje, Balldre-Torovicë, Zadrime ka gjithashtu qindra ha tokë të përmbytura.
Probleme ka në Gjorm dhe Zheje të Bashkise Kurbin, ku ka përmbytje edhe të shtëpive, për shkak të shkarkimit të rezervuarit. Po kështu zona e Fushe-Kuqe ka prezence të madhe ujë, ku janë përmbytur shumë toka. /Opinion.al
