Një varkë peshkimi është përmbysur ditën e sotme pranë zonës së Currilave në Durrës. Mësohet se brenda mjetit lundrues ndodheshin dy peshkatarë.
Njëri prej peshkatarëve është shpëtuar dhe po transportohet me urgjencë për në spital. Ndërkohë, policia njofton se peshkatari tjetër dyshohet se është mbyur.
Bëhet me dije se peshkatarët kishin hyrë në det me një varkë druri të palejueshme për të mbledhur rrjetat. Aktualisht, vijojnë kërkimet me mjete lundruese si dhe janë nisur polumbarët e RENEA-s për gjetjen e 52-vjeçarit.
Njoftimi i policisë
Më datë 01.03.2020, rreth orës 12:25, në lagjen nr.1, Durrës, dy shtetas ishin futur në det me një pedalon për peshkim, ku si pasojë e dallëgëve pedaloni është përmbysur.
Menjëherë pas njoftimit të marrë shërbimet e Policisë Kufitare dhe ato të DVP Durrës kanë dalë në det me mjet lundrues dhe në bashkëpunim me një prej familjarëve është bërë e mundur nxjerrja në breg e shtetasit I.B, rreth 48 vjeç, i cili ndodhet në spital nën kujdesin e mjekëve, ndërsa personi tjetër shtetasi A.M, rreth 52 vjeç, dyshohet se është mbytur.
Shërbimet e Policisë vijojnë kërkimet me mjete lundruese si dhe janë nisur polumbarët e Reneas për të bërë të mundur gjetjen e tij. / Opinion.al
