Një minibus që transportonte alpinistë në Iran u zhyt në një luginë, dhe si pasojë dhjetë persona humbën jetën, njoftuan mediat shtetërore të shtunën.
Aksidenti ndodhi pranë qytetit Varzaghan, në provincën e Azerbajxhanit Lindor, tha zëdhënësi i shërbimeve të urgjencës provinciale, Vahid Shadinia, sipas agjencisë shtetërore të lajmeve IRNA.
Minibusi ishte duke shkuar drejt një fshati turistik në rajonin malor, kur për motive të paqarta u përmbys dhe ra në luginë, tha zyrtari.
“Dhjetë persona duke përfshirë shoferin u vranë dhe tetë u plagosën,” tha Shadinia, duke shtuar se, “nëse rripat e sigurimit do të ishin shtrënguar, numri i viktimave do të ishte më i ulët”.
Megjithëse rrugët janë përgjithësisht në gjendje të mirë, Irani ka një nga normat më të larta të vdekjeve nga trafiku në botë, pjesërisht për shkak të mënyrës të dobët të drejtimit, si dhe ndikimit të sanksioneve ndërkombëtare në mirëmbajtjen e automjeteve.
