Gareth Peirce, njëri nga avokatët e Julian Assange, deklaroi se kërkesa e Shteteve të Bashkuara për ekstradim është shtyrë për muajin qershor, sepse themeluesi i Wikileaks është shumë i sëmurë.
“Ai në fakt nuk është aspak mirë. Gjatë shtatë javëve në Belmarsh, shëndeti i tij ka vazhduar të përkeqësohet dhe ai ka humbur peshë në mënyrë dramatike. Vendimi i autoriteteve të burgut për ta dërguar atë në një vend për përkujdesje shëndetësore flet vetë”, ka thënë avokati, Gareth Peirce, për mediat.
Uashingtoni është duke kërkuar ekstradimin e Assange, i cili është arrestuar pasi është larguar nga Ambasada e Ekuadorit në Londër më 11 prill, për shkak të dyshimeve rreth rolit që ka pasur në publikimin e materialit të klasifikuar ushtarak dhe diplomatik më 2010.
Aktualisht, Assange përballet me 18 akuza penale në SHBA, dhe mund të kalojë dekada në burg në rast se shpallet fajtor./Opinion.al
