Deputetja e Partisë Demokratike, Rudina Hajdari është një nga të paktët deputetë të opozitës, që nuk e kanë dorëzuar mandatin e deputetit, si pjesë e një veprimi të përbashkët që ndërmorën forcat politike në minorancë. Nëpërmjet një reagimi të gjatë në llogarinë e saj në Facebook, Rudina Hajdari ka njoftuar se nuk është shprehur deri tani për shkak të problemeve shëndetësore dhe se shumë shpejt do të dalë me një qëndrim publik.
Siç e thotë në deklaratën në rrjetet sociale, Rudina Hajdari e ka konsultuar vendimin e saj me personalitete politike ndërkombëtare, pjesë të Bashkimit Europian dhe Shteteve të Bashkuara të Amerikës.
Por këtë të enjte ajo ka bërë një tjetër postim në rrjetet sociale. Duke etiketuar një numër të lartë personalitetesh në SHBA dhe BE, zonja Hajdari ka shpërndarë një intervistë që sekretari për Marrëdhëniet me Jashtë i Partisë Demokratike ka dhënë për mediat.
Në mënyrë ironike ajo ka shkruar “mirë që ma thatë”. Por për çfarë bëhet fjalë konkretisht?
Bogdani gjatë intervistës deklaroi se nëse zonja Hajdari nuk do të digjte mandatin qëndrimi Partisë Demokratike do të ishte i njëjtë si me zotin Murrizi: “Besoj se standardet duhet të jenë të njëjta. Nuk mund të bëjmë standarde të dyfishta, nuk ka ndryshime midis Rudina Hajdarit dhe Myslim Murrizit në këtë rast”, duke shtuar gjithsesi që “ajo në dhjetor ishte e gatshme të digjte mandatin”. Të njëjtën linjë, atë të përjashtimit ka mbajtur dhe ish kryeministri Berisha mbrëmjen e së enjtes po në një intervistë televizive, për zonjën Hajdari./ Opinion.al
