Një reportazh i shkruar nga Daily Mail ka nxjerr në pah një plagë të madhe të Shqipërisë, kryesisht të këtyre dy dekadave të fundit, mbi emigracionin masiv të të rinjve nga veriu i vendit drejt Britanisë së Madhe, në të shumtën e rasteve nëpërmjet kamionëve, për një pagesë prej 12 mijë paund për person.
Gazetari Tom Kelly ka qenë në qytetin Krumë të Kukësit, të cilin e quan “periferinë më të pashpresë të Londrës”, duke iu referuar numrit të lartë të banorëve të tij që jetojnë në Britani.
“E rrethuar nga malet me dëborë, Kruma është periferia më e pashpresë e Londrës. Edhe pse është 1600 milje nga kryeqyteti britanik, banorët në fshatin shqiptar e mendojnë veten sikur jetojnë në një prej lagjeve të tij (Londrës). Autoritetet thonë se pothuajse çdo familje ka të paktën një pjesëtar në Britani dhe zakonisht të paktën një tjetër që shpreson të shkojë atje. Shumica e fëmijëve të fshatit kanë shkuar në Britani në mënyrë ilegale, me trakantët e njerëzve, zakonisht me ndihmën e prindërve të tyre. Me shumë pak punë në komunitetin në veri të Shqipërisë, të rinjtë e kalojnë ditën në kafen e fshatit ‘Londër’, duke diskutuar se si të shkojnë atje”,-shkruan gazetari i Daily Mail.
Në artikull jepen dëshmitë e disa banorëve të Krumës, që kanë fëmijët e tyre në Britani, shumica e tyre të mitur, të cilët shprehen se pavarësisht mallit që ndjejnë për ta, nuk dëshirojnë të kthehen në Shqipëri pasi nuk mund t’u sigurojnë jetesën.
“Na mungon shumë, por nuk duam që të kthehet në Shqipëri. Nuk na del që ta mbështesim. Këtu nuk ka asgjë për atë. Asgjë”, është shprehur Isa Rexha, ish-oficer policie, i cili ka dy vite që nuk e sheh djalin e tij 15 vjeçar.
Si Rexha ka edhe shumë policë të tjerë dhe zyrtarë të bashkisë që kanë fëmijët e tyre në Britani. 834 adoleshentë kanë braktisur shkollën përgjatë viteve 2013-2016 dhe pjesa më e madhe e tyre kanë tentuar të emigrojnë drejt Britanisë.
