Turku Nejdet Cesuroglu, i cili ishte në kërkim nga Policia shqiptare, u gjet i vdekur në fillim të muajit dhjetor në një banesë në Prishtinë, ku policia gjeti edhe 113 kg heroinë si edhe arrestoi 4 persona.
Cesuroglu kërkohej si një nga kokat që kishte porositur heroinën e kapur në laboratorin e Hasit.
Trafik ku ishin përfshirë edhe shumë persona të tjerë, midis të cilëve edhe krerë të bandës së Shijakut.
Përgjimet e fundit të publikuara nga “Shqiptarja.com” dhe “Report Tv” bëjnë të ditur se dy shtetasit turq, Iskender Sale dhe Nejdet Cesuroglu si dhe një kosovar me emrin Xhemal Shalla, mendohet të kenë qenë në Shqipëri, për të takuar Admir dhe Hekuran Hoxhën, edhe këta të implikuar në trafikun e heroinës së kapur në Has.
Sipas Policisë së Krimeve të Rënda qëllimi i takimit ishte gjetja një baze në Durrës, ku të fshihnin drogën, e cila më pas do të kalonte nëpërmjet Portit të Barit në Evropë.
Hekuran Hoxha, i njohur ndryshe si “Roni i Shijakut” u arrestua 7 ditë më parë në Durrës, ndërsa Admir Hoxha, djali I tij I xhaxhait, vazhdon të jetë një person në kërkim ndërkombëtar.
Biseda e zhvilluar midis tyre i takon gushtit të vitit 2018, ku flasin edhe për shumë konkrete.
Ndërkohë në tetor 2018, Admir Hoxha, flet me një person që I thotë se ka ardhur në Shqipëri dy shtetas turq që mendohet të jenë Iskender Sale dhe Nejdet Cesuroglu si edhe një kosovar, Xhemal Shalla.
Transkripti i përgjimit midis Ronit të Shijakut dhe Admir Hoxha, 30 gusht 2018
Roni: Ka je?
Admir: Hiq… në Tiranë
Roni: E qa do bëjmë do takojmë sot
Admir: Po thanë, e lamë me këtë shokun tim se ka gjet ky ni ashtu aty n’Durrës që merr vesh nga këto letrat
Roni: Okej… rregullojmë njëherë letrat…
Roni: Mirë… shife vetë edhe ashtu, po me atë ke fol me të
Admir: Jo mor burrë s’kam fol u ba nja një javë ni javë u ba… hajt se folim nga afër…
Komunikim ndërmjet numrit 069XXX50 me numri +333 në përdorim të Hekuran Hoxhës në 14 gusht 2018 ku i dërgon sms me tekst:
“…O shok po më vjen Dori përditë… kam për t’i dhonë 800…”.
Ndërkohë në një tjetër komunikim mes Saimir Gjepalit dhe Ronit të Shijakut, Gjepali i dërgon sms me tekst:
“…o shok në dark do shkoj te ai se se nuk erdhi knejr. hë shok a vonohesh? A ikim bashkë? I tha do vij të takoj e kemi lon në 9 e gjys për zotin. o shok s’ka ardh akoma…?”.
Ndërsa në një komunikim tjetër të datës 12 shtator 2018 me një person të paidentifikuar i vjen ky mesazh:
“…jam në Kosovë vij vonë nga darka…”.
Më pas një person i paidentifikuar i dërgon një sms Hekuran Hoxhës, ku i thotë:
“…o Rono më erdh Dori ke puna osht dhy puna keq po s’më dhe lekët deri sonte nesër i du gjith më tha. e kam litarin n’fyt. o shok a bane noj gjo për atë 500 paktën t’i jap atë…”.
Roni: Nesër kismet shok….
Komunikon mee numrin 069XXX784, ku ky i fundit i dërgon në datën 14.08.2018 sms:
“Të them unë se munt të hiki në Lezh me kët shokun dhe kthehem direkt në Tiranë po nuk hika hikim bashkë”.
Sërish Ronit i shkruar një person tjetër ku i flet për një borxh financiar duke i shkruar në 14 gusht 2018:
“amon mer shok të kishim maru punë se kam dal legen me atë e kam majt gjith ditën tel të fik”.
Roni i kthen SMS: “ke të drejt, e di er shok kam dal dhe unë legen me ty. sa të vij të mar unë”.
Ndërsa sipas transkripimit të përgjimeve të datës 17 tetor 2018, ndërmjet Admir Hoxhës dhe një personi tjetër, në kohën kur kishin ardhur shtetasit nga Turqia dhe shtetasi kosovar zhvillohet kjo bisedë:
Admir: alo o flori si kalove nesër vijnë ca miq të mij aty thuaju të ulen në kafe…
+544: do vijnë ca miq tuj dhe do shkojnë te kafja….
Admir: thuaju të ulen te kafja…
+544: Ado erdhën këta tre shokët unë po ju flas anglisht por s’po më kuptojnë
Admir: m’i jep në telefon
+544: po (nga ana e OPGJ-ë është lënë shënimi se personat flasin turqisht me Adin).
