Prokuroria për Krimet e Rënda është në fazën përfundimtare të veprimeve hetimore, për të dorëzuar në gjykatë dosjen për Emiljano Shullazin dhe dy bashkëpunëtorët e tij, Gilmando Dani dhe Blerim Shullazi.
Mësohet se prokuroria do të kërkojë caktimin e masës “arrest me burg” për të ndaluarit.
Veprimet hetimore të kësaj çështje po kryhen nga drejtuesi i Prokurorisë për Krimet e Rënda, Besim Hajdarmataj.
Ndërsa gjyqtari që do të caktojë masat është Sandër Simoni, Kryetari i Gjykatës së Shkallës së Parë për Krimet e Rënda.
Simoni mësohet të ketë firmosur edhe vendimin për përgjimin e të ndaluarve.
Nga këto përgjime, Prokuroria thotë se janë përfituar elementë të vlefshëm, të cilët faktojnë akuzat e ngritura për gjobëvënie, përvetësim prone, shantazh, vendosje eksplozivi dhe grup i strukturuar kriminal.
Janë përgjuar disa numra telefoni dhe kërcënimi kryhej në emër të Emiljano Shullazit.
Në rastin e biznesmenit Jani Zaka, kërcënimi, sipas policisë dhe prokurorisë, është kryer personalisht nga Shullazi.
Në përgjim, prokuroria ka mbajtur për një kohë të gjatë dy të ndalurit, Gilmando Dani dhe Blerim Shullazi.
Edhe në bisedat e tyre, prokuroria thotë se ka gjetur elementë të vlefshëm që provojnë përfshirjen e tyre në veprat kriminale për të cilat akuzohen. /Tv Klan
