Prokuroria ka nisur hetimet ndaj policisë e cila është denoncuar se po bën përgjime të paautorizuara. Burime nga institucioni i akuzës kanë bërë të ditur se, kanë nisur hetimet për pajisjen e cila është blerë nga policia dhe po përdoret për të përgjuar në mënyrë të paligjshme.
Mësohet se hetimi është regjistruar dy ditë më parë, ndërsa ka nisur hetimet. Kanë qenë shërbimet e inteligjencës që kanë njoftuar prokurorinë se “policia ka blerë një pajisje për përgjime dhe po i bën ato në mënyrë të paligjshme”.
Dy ditë më parë media bëri të ditur se, një pajisje tepër e sofistikuar përgjimi është instaluar në Drejtorinë e Përgjithshme të Policisë prej më shumë se 1 muaji.
Ky fakt u bë me dije nga gazeta ‘Mapo’, e cila shkruan se pajisja nuk është regjistruar në asnjë regjistër dhe për këtë institucionet ligjzbatuese janë vënë në alarm. Sinjalizimi është dhënë nga institucionet e inteligjencës, pasi mësuan se Policia e Shtetit dispononte këtë pajisje të sofistikuar të dhuruar nga Italia.
Për këtë, u njoftua Prokuroria e Përgjithshme, pasi Policia nuk ka asnjë tagër të kryejë përgjime të paautorizuara më parë nga Prokuroria. Asnjë institucion s’ka dijeni për pajisjen e Policisë, që nëse konfirmohen informacionet e servirura nga inteligjenca, atëherë ky rast do të përbëjë një skandal.
Në rrugë jo zyrtare, nga policia thonë se kjo pajisje përdoret për trajnimin e efektivëve, shkruan Mapo. Pajisja është futur në doganë pa u regjistruar dhe në institucionet e sigurisë është ngritur alarmi se policia po kryen përgjime të paautorizuara.
