Presidenti Donald Trump pranoi ftesën nga Mbreti Charles II që iu dorëzua nga kryeministri britanik, Keir Starmer për një vizitë të dytë shtetërore, të cilën tha se do ta bënte shumë shpejt.
Dorëzimi i ftesës tek Trump ishte ndër porositë e para për kryeministrin e Mbretërisë së Bashkuar, Keir Starmer, i cili vizitoi Shtëpinë e Bardhë për bisedime mbi Ukrainën.
“Kjo është një letër nga Mbreti, një ftesë për një vizitë të dytë shtetërore,” tha Starmer. “Kjo është vërtet e veçantë. Nuk është bërë kurrë më parë.”
“Përgjigja është po. Shteti juaj është një shtet fantastik”, tha Trump.
Duke hapur letrën, Trump tha se mbreti Charles është “një burrë dinjitoz dhe një njeri i mrekullueshëm”.
Ftesa nënvizonte strategjinë e Starmer-it për t’i bërë thirrje presidentit të ri të SHBA-së dhe për të ruajtur të ashtuquajturën “marrëdhënie speciale” midis Amerikës dhe Britanisë.
Ai ndoqi strategjinë e krijuar nga një prej paraardhësve të tij, Theresa May, e cila njoftoi gjatë vizitës së saj në Shtëpinë e Bardhë të Trump në janar të vitit 2017 se Mbretëresha Elizabeth II e kishte ftuar presidentin për një vizitë shtetërore.
Nuk u realizua për dy vjet e gjysmë, por përfundimisht Trump shkoi në Londër për një vizitë madhështore, e cila përfshinte përshëndetje me armë, çaj me familjen mbretërore dhe një banket shtetëror.
