Nga 1 Janari, gazin e lëngshëm do ta paguajmë më shtrenjt. Rritja e çmimit do të rëndojë jo vetëm konsumatorët e shumtë familjarë që e përdorin gazin për ngrohje dhe gatim por edhe drejtuesit e mjeteve që kanë kthyer makinat me gaz pikërisht për të shpenzuar më pak. Gjithashtu, kjo është një barrë e shtuar edhe për shumë biznese që kanë makineritë që punojnë me gaz.
Dje pasdite në Komisionin e Ligjeve u votua me shumcë votash pro rritjes së akcizës së gazit me 8 lekë për litër. Kundër ishte vetëm PD-ja.
As LSI, nuk ia doli të çojë në fund nismën që ndërmori për mosrritjen e akcizës së gazit. Dje deputetët e LSI ngritën dorën pro këtij drafti. Më herët LSI-ja ishte kundër vendosjes së taksës së gazit, për të cilën u propozua një amendament nga kryetari i Grupit, Petrit Vasili. Gjatë mbledhjes së Komisionit deputeti i LSI, Përparim Spahiu tha se “palët kanë rënë dakord për vendosjen e akcizës 9 lekë për litër”.
Ndërsa deputeti i maxhorancës, Anastas Angjeli, propozoi që akciza të vendoset 8 lekë për litër. “Unë propozoj që ta bëjmë 8 lekë, që të jemi në rregull”, tha ai. Nga maxhoranca i vetmi ishte kryetari i Komisionit të Ekonomisë, Erion Braçe i cili kërkoi të qendronte propozimi i qeverisë për akcizën 13 lekë/litër.
Deputetët e opozitës votuan kundër akcizës, pasi, sipas tyre, taksa rëndon te qytetarët. “Ju ngrini si shqetësim administrimin e gazit, por kjo nuk zgjidhet me rritje çmimi. S’ka asnjë garanci që çmimi nuk do të rritet për familjarët”, u shpreh deputeti Edmond Spaho.
Po nga PD, Florion Mima, u shpreh se “Qëllimi është që të mbushet buxheti, jo të shtohet siguria”. Ai u shpreh i zhgënjyer nga LSI-ja se nuk e mbajti fjalën deri në fund për të hequr taksën.
Ndërkohë, ministri i Financave, Ahmetaj tha se kjo bëhet për të rritur sigurinë. “Sot në bezinatë shkon edhe makina qoftë e certifikuar apo e modifikuar dhe qytetari. Qytetarët do të kenë pika të certifikuara, ku do të blejnë produktin të siguruar”, tha ministri.
