Përfaqësues të lartë të diplomacisë në Tiranë kanë reaguar pas protestave për vrasjen e 25-vjeçarit, Klodian Rasha. Pas ambasadores së SHBA, Yuri Kim dhe atij të BE Luigi Soreca, ka folur për situatën e krijuar në kryeqytet edhe ambasadori gjerman në Tiranë, Peter Zingraf si dhe ka dhënë një mesazh prezenca e OSBE në Tiranë.
Ambasada e OSBE-së në Tiranë teksa shpreh keqardhjen për vdekjen e Klodian Rashës dhe bën thirrje për ndalimin e dhunës.
“Prezenca e OSBE-së në Shqipëri shpreh keqardhjen e saj të thellë për vdekjen e Klodian Rashës dhe besimin se ajo do hetohet si duhet. Mendimet dhe lutjet tona janë për familjen e tij. Tani, ne bëjmë thirrje për përmbajtje nga çdo lloj dhune dhe që të lejohet ligji të veprojë”, deklaron OSBE.
Ndërsa ambasadori gjerman Peter Zingraf ka thënë se vdekja e Rashës duhet zbardhur plotësisht por sipas tij dhuna nuk mund të jetë zgjidhje për këtë ngjarje.
“Ngjarjet e ditëve të fundit më mbushin me shqetësim dhe trishtim. Vdekja e të riut më ka prekur edhe mua shumë. Është e rëndësishme dhe e drejtë, që kjo ngjarje të zbardhet plotësisht. Mendimet e mia janë pranë familjes së viktimës. Por ajo çka na mëson gjithashtu ky rast tragjik është dhuna nuk mund të jetë zgjidhja. Ushtrimi i lirë i të drejtës për protesta është thelbësor për çdo demokraci. Por, edhe kur bëhet fjalë për gjëra shumë emocionale dhe elementare: vetëm protestat paqësore legjitimohen si demokratike. Unë i bëj thirrje të gjitha palëve, të heqin dorë nga dhuna”, shkruan ambasadori gjerman Peter Zingraf./ Opinion.al
