Policia Rrugore e Tiranës ka gjobitur me 40 mijë lekë shoferin e Ministres së Shtetit për Sipërmarrjen dhe Klimën e Biznesit, Delina Ibrahimaj.
Shkak sipas policisë, është fakti se në makinën tip Benz ngjyrë e bardhë me targë AB672FB në pronësi të Drejtorisë së Shërbimeve qeveritare dhënë në përdorim për ministren Ibrahimaj “përdoreshin fenelinat e policisë në mënyrë të paligjshme”.
Në momentin e ndëshkimit, në drejtim të makinës ka qenë shoferi i ministres Aranit Micka .
Policia e Shtetit, nëpërmjet një njoftimi, sqaroi se nuk do të tolerohet askush që përdor fenelinat dhe simbolet e policisë në mënyrë të pa autorizuar.
“Njoftim i Rëndësishëm! Sot kemi ndërmarrë masa të rrepta ndaj disa mjeteve që shkelin rregullat e qarkullimit rrugor. Në mesin e tyre janë edhe automjete të punonjësve të administratës shtetërore me imunitet.
Në videon tonë, mund të shihni se si këto mjete, përfshirë ato që përdorin fenelinat e policisë në mënyrë të paligjshme, janë trajtuar sipas ligjit. Kjo veprimtari është pjesë e angazhimit tonë për të siguruar një mjedis të sigurt rrugor për të gjithë. Nuk ka përjashtime kur bëhet fjalë për sigurinë rrugore!”, thuhet në njoftimin e policisë.
