Zjarrfikësit e Vlorës të cilët prej më shumë se dy javësh po përballen me një situatë të pazakontë të zjarreve në zonë, shprehen se punojnë në kushte të vështira dhe as nuk janë paguar për orët shtesë. Ai shprehet se mungojnë mjetet bazë të punës, veshja e mbrojtjes personale, kokorja, maska, kundra-gazi.
“Kjo zonë është shumë e rrezikshme. Si për ne dhe për të gjithë se terreni është shumë i thyer, shkurret janë shumë të larta dhe temperatura e flakës nuk të lë të afrohesh”, ka thënë në një intervistë për mediat zjarrfikësi Luan Kapaj. Emri i tij u bë i njohur edhe për përfshirjen në operacionet e kërkimi-shpëtimit pas tërmetit të vitit 2019.
Zjarrfikësi tregon se puna për shuarjen e zjarreve është tepër e vështirë dhe mungojnë një pjesë e mirë e pajisjeve për kryerjen e saj.
“Puna jonë është shumë e vështirë sidomos këtë verë që temperaturat kanë bërë të mundur favorizimin e këtyre zjarreve e megjithatë nga përvoja që kemi ia kemi dalë ta përballojmë mirë të gjithë këtë situatë. Duke parë terrenin e vështirë në këtë zonë e kemi pasur të vështirë pasi pylli i lartë, shkurret e dendura dhe terreni i thepisur e ka bërë të vështirë të përballesh me këtë situate dhe duhet të kesh guxim, forcë dhe të dish si ta fillosh punën dhe ja kemi dalë.
Fatkeqësisht edhe nëse ngremë zërin për ndonjë pajisje apo mjet nuk kërkojmë luks. Ne kërkojmë mjete të domosdoshme, pajisje minimale dhe veshje mbrojtëse personale që të kryejmë punën që na ngarkon ligji që të futemi në zonën e rrezikut dhe jo ta shohim atë nga larg. Nëse do të kemi veshjet dhe mjetet e duhura do t’i afrohemi sa më shumë zjarrit për ta shuara atë. Mua sot më mungon veshja e mbrojtjes personale, kokorja, maska, veshja, kundra-gaz, nëse unë nuk mbrojt dot veten nuk shpëtoj dot jetë”, tha Kapaj.
Ndërsa foli lidhur me çeshtjen e pagesave të vonuara, ai tha se kanë marrë vetëm 40 orë, nga shumë të tilla.
“Sipas ligjit duhet të punojmë 174 orë dhe për këtë periudhë kemi marrë urdhrin për gatishmërinë duke punuar mbi këtë norme. Sipas ligjit ne kemi marrë 40 orët shtesë dhe pjesa tjetër na u premtua të na jepet në muajt në vijim. Flasim për shumë orë shtesë që janë të llogaritur sipas librit të regjistrit në strukturat e zjarrfikëses. Ne nuk na mungon guximi, por që ta bësh tamam punën duhet të jesh i mbrojtur dhe jo të lihemi në mëshirë të fatit. Premtimi ishte që do na jepen orët shtesë sipas rregullave në muajt në vazhdim”, tha zjarrfikësi.
Kryetari i bashkisë së Vlorës Dritan Leli siguroi se zjarrëfikësit do të paguhen për çdo orë që shërbejnë. Sipas legjislacionit, bashkitë duhet që të paguajnë punonjësit e zjarrëfikëses 25% më shumë për çdo orë pune shtesë gjatë javës, dhe 50% për çdo orë pune gjatë ditëve të pushimit dhe po kaq nëse kanë punuar gjatë natës./Opinion.al
