Nga Dritan Laci
Në një vend të mbushur me korrupsion, vrasje, grabitje, ku bosët e drogës arratisen në hundën dhe dijeninë e shtetit, dhe ku askush dhe askujt nuk i hyn gjemb në këmbë, ja ku papritur sonte na u gjet edhe një mish për top i cili duhet të marrë përsipër të gjithë barrën e pisllëqëve që kanë mbuluar këtë vend.
Dhe ky quhet Shukriu. Po po Shukriu i Dibrës? Dhe e dini pse?
Sepse Shukriu pranoi që kishte bërë atë që s’duhet të bënte.
Po po pikërisht për këtë faj Shukriu do të qëndrojë me vendim të Prokurorisë pas hekurave me akuzën korrupsion pasiv dhe kërkim të favoreve seksuale në këmbim të një vendi pune.
Po sa e sa ka si Shukriu jashtë hekurave në këtë vend ku vidhen miliarda.
Ku çdo ditë që lind nuk ngryset pa një megaskandal.
Ku politikanët shajnë njëri-tjetri ditën ditën për diell nga nëna e motra si të korruptuar nga e hëna e parë e vitit deri në të fundit, 365 ditë të vitit.
Ku kriminelët lëvizin lirshëm dhe arrijnë deri aty sa të kërcënojnë edhe akademikët.
Ku bosët e drogës dhe vrasësit sa herë që shpallen ndërkombtarisht në kërkim e gjejnë TIMS-in të fikur.
Ku administrata është e mbushur me mitomanë që fryjnë plëncin me para të zhgrrapura pameritërisht nga xhepat e taksapaguesve dhe askush nuk i dërgon në burg.
Ku dy fëmijë, dy ëngjëj, humbasin jetën pasi një megaaferë korruptive shkon edhe u sharron trafikndarësen sepse ai që ka karburantin ka djalin shef kabinetin. Djali shef kabineti ka babain ish-deputet. Babai ish-deputet ka mik ministrin.
Ku ministri që duhet të ketë përgjegjësinë minimale të distancohet nga ky skandal që lidhet pikërisht me punën e ministrisë së tij, nuk denjon qoftë edhe të kërkojë një ndjesë publike dhe jo më të japë dorëheqjen.
Ku njerëzit futen në burg për një tuf presh a një çati pa leje, ku berberi ha burgun se qethi pa kupon, ndërsa krimineli, hajduti me pushtet, shantazhuesi, sekseri, shëtisin serbes-serbes në mes të ditës si kajmekam.
Ja pra pse sonte na u zgjodh si kokë turku për të gjithë këto zullume Shukriu.
Sepse Shukriu ka bërë një faj, një faj shumë të madh.
Shukriu kërkoi të merrte diçka që se meritonte, duke shfrytëzuar pushtetin e tij. Dhe e pranoi….
Sigurisht një akt i dënueshëm.
Po a është Shukriu e keqja më e madhe e këtij vendi, sa të meritojë burgun?
Ndoshta po të kishte përdorur atë gjësendin poshtë potureve sot ti Shukri mund ishe një burrë i lirë, i nderuar, ashtu si shokët e tu po kaq zullumqar në politikë.
Por a po bëhesh sot ti Shukri kokë turku. Me qëllim heqjen e vëmendjes nga të gjithë këto zullumet që i kanë zënë frymën këtij vendi?
A mos u duhesh ti Shukri si kurban për Reformën në Drejtësi?
Për tu thënë ndërkombëtarëve që këtu korrupsioni po luftohet…..
A mos u duhet një Shukri nga Dibra.
Një Shukri që ska kush ti mbajë krahun.
Por që u erdhi si bekim pikërisht në kohën e duhur kur laku i prapësive ka shkuar aty ku s’mban më, dhe duhej një Shukri për kokë në sini????!!!
