Një pensionist nga Gjermania lindore pretenton se ka gjetur bombat bërthamore të Adolf Hitlerit, të fshehura në bunkerë nëntokësorë.
Peter Lohr, 70 – vjeç, përdori një radar penetrues në tokë, në Luginën Jonas, në Thuringia, ku ai thotë se gjeti shpella të mëdha nëntokësore.
Lohr, me profesion inxhenier mekanik, shprehet se forma e objekteve është e njëjtë me armët bërthmore. Ai përdori teknologjinë e imazheve 3D për të identifikuar 5 objekte të mëdha, që pretendon se janë bomba bërthamore.
“Ato kanë 71 – vite që qëndrojnë nëntokë dhe në një moment të caktuar do të kalben, duke shkaktuar një Çernobil të dytë”, tha 70 – vjeçari për gazetën gjermane “Bild”.
Mësohet se Lohr është urdhëruar nga autoritetet që të mos vijojë me kërkimet e tij.
Gjatë fundit të Luftës së Dytë Botërore, të burgosurit e luftës u detyruan që të gërmonin 25 tunele nën malin e Luginës së Jonas, por puna e tyre u ndërpre përpara përfundimit të luftës dhe qëllimi i gërmimeve mbetet i panjohur.
Në 2015 – ën, dy historianë amatorë thanë se kishin gjetur një tren të fshehur në një tunel në Poloni, të mbushur me ar nazist. Megjithatë, ekspertët, që nisën kërkimet në këtë zonë, nuk arritën të gjenin gjë./klan
