Ardian Doçaj, i akuzuar bashkëpunëtorë në pengamarrjen dhe vrasjen e Jan Prengës, është vetëdorëzuar sot në pikën kufitare Hani i Hotit.
Ditën e djeshme Operacioni Forca e Ligjit i sekuestroi pasurinë Ardian Doçajt. 32- vjeçarit i janë sekuestruar një banesë dykatëshe në lagjen ‘Bleran’, të njësisë administrative Rrethina, dhe tre automjete.
Po ashtu Doçaj, kishte deklaruar një ditë më parë se donte të sqaronte situatën dhe akuzat ndaj tij, duke u shprehur se nuk është i përfshirë në vrasjen e Jan Prengës.
Pak ditë më parë për rastin e Jan Prengës u arrestuan edhe Leonard Hajri, Bajram Hajri, Elton Hajri, Festim Bexhdili dhe Olsi Turja. Ata u lanë në burg nga Gjykata e Tiranës.
Këta shtetas, së bashku me Altin Hajrin, i cili është pronari i një kompleksi në Shijak, dyshohet se janë urdhëruar nga një grup kriminal për të rrëmbyer viktimën në 17 janar të këtij viti në Kamëz. Pas rrëmbimit dhe dhunës së ushtruar, Jan Prenga ka gjetur vdekjen rrugës për në një kompleks në Shijak./ Opinion.al
