Një pëllumb garash, i quajtur Armando, u shit me një çmim që kap një vlerë që shënon rekord botëror, prej 1.25 milionë euro. Ky çmim ka ardhur si rezultat i garës së nxehtë që u zhvillua gjatë ankandit, ku më të interesuar dukeshin një grup manjatësh kinezë. Oferta nisi me 100 mijë euro, por u rrit derisa arriti në çmimin rekord 1.25 milionë euro.
Pëllumbi postier është njëherësh kampion i shumëfishtë në garat në shtigje të gjata, megjithatë, theksohet se pëllumbi i blerë nuk do të përdoret për gara, por vetëm për qëllime riprodhuese.
Kujdestari i tij, Jowl Verschoot, 63 vjeç nga Ingelmunster në Belgjikë, tha se pëllumbi i tij lindi për të qenë një kampion, por se asnjëherë nuk e kishte pritur se dikush do të ofronte një shumë kaq të lartë për të.
“Të dy kinezët më thanë se ata ishin të interesuar veçanërisht për Armandon. Mirëpo, unë nuk e mendoja kurrë këtë gjë. Kjo është padyshim një lavdi që kurorëzohet në rritjen dhe stërvitjen që iu kam bërë pëllumbave”, deklaroi ai për mediat ndërkombëtare.
Jowl është ekspert në rritje pëllumbash, dhe pretendon se njeh 500 pëllumbat e tij me emra, ndërsa kalon 12 orë në ditë duke i rritur, ushqyer dhe stërvitur ata./Opinion.al
