TIRANE- Një ditë pasi Kryeministri Edi Rama dhe Presidenti i FSHF, Duka prezantuan projektin e ri të stadiumit Qemal Stafa që do të quhet “Arena Kombëtare” ka reaguar Partia Demokratike. “Plani më i madh korruptiv i klienteve të tij, është kjo qendër e madhe biznesi në stadium”, tha PD. “Mirëfilltazi kemi të bëjmë me një aferë financiare, dhe jo me një arenë sportive”, vijoi zedhenesja.
Sipas opozitës, projekti është bërë në mungesë të plotë transparence e konsultimi publik. “Edi Rama ka bërë fakt të kryer projektin e tij për të zaptuar bashkë me miqtë dhe klientelën e vet zonën historike dhe monumentale, ndër më të shtrenjtat e fitimprurëset në Tiranë, me dyqane, beton e hotel”, tha PD.
Pjesë nga deklarata
Partia Demokratike e pati lajmëruar dhe denoncuar këtë skemë korruptive që me 24 janar të këtij viti. Por në fshehtësi të plotë Edi Rama ka vazhduar me këtë plan antisportiv në fakt, që futbollin e ka si mbulesë për pazarin e madh me qendrën tregtare.
Partia Demokratike lajmëron edhe një herë të interesuarit bankat dhe sipërmarrësit që janë thirrur të bëhen pjesë e këtij aksioni korruptiv e financiar të Edi Ramës, se ne nuk e njohim dhe do ta anulojmë menjëherë këtë projekt hajdutërie, sapo shqiptarët të na besojnë drejtimin e vendit.
