Ish-zv/ministri i Shëndetësisë, Bardh Spahia, përmes një foto të publikuar në “Facebook”, ka treguar se vaksina antigrip e shpërndarë ditët e fundit në qendrat shëndetësore në të gjithë vendin, është prodhim kinez i dyshimtë.
“Siç shihet është prodhim kinez, pa asnjë fletë udhëzues në shqip në kundërshtim të hapur me ligjin për barnat ku specifikohet qartë detyrimi që çdo bar që hyn në Shqipëri të ketë fletëudhëzimin në shqip“, shkruan ai.
Spahia, drejtues i Departamentit të Emigracionit në PD, ka denoncuar, sot, një skandal të ri në fushën e shëndetësisë, një skandal që ndikon direkt në jetën e qytetarëve shqiptarë në një kohë kur epidemia e gripit siç po deklarohet ka marrë përmasa të mëdha.
Sikur të mos mjaftonte fakti që ky vaksinim po kryhet jashtë çdo afati, pasi periudha e duhur për vaksinimin kundër gripit është tetor – nëntor, tani pacientëve shqiptarë u duhet të përballen dhe me këtë produkt me cilësi e origjinë të dyshimtë.
Kjo është “shëndetësia falas” e Ilir Beqjes dhe Edi Ramës,” e përfundon konkluzionin e tij, koordinatori i PD-së.
