Partia Demokratike i ka kërkuar KQZ-së dokumentacionin e procesit të votimit të shqiptarëve nga diasora.
Përmes një shkrese zyrtare dërguar Komisionit Qendror të Zgjedhjeve dhe e firmosur nga Sekretari i Përgjithshëm i PD-së, Flamur Noka, renditen 8 pika.
Pikat:
1-Dokumentacioni juridiko-ligjor që vërteton se çdo emigrant i regjistruar në platformën PER ka marrë dhe dorëzuar zarfin personalisht, ka firmosur vetë dhe ka paraqitur mjet identifikimi.
2-Inventarin e zarfeve të diasporës, ato që janë të papërdorura, vendndodhjen aktuale të tyre dhe kshtet e sigurisë.
3-Numrin e fletëve të diasporës të vulosura nga KQZ-ja, por që nuk janë shpërndarë, duke përfshirë dhe ato të fondit rezervë.
4-Numrin e sasisë së zarfave të papërdorura A dhe B, si dhe vendndodhjen e tyre aktuale.
5- Sa zarfa janë dorëzuar tek DHL-ja, sa janë kthyer pas si të parregullta për t’u marrë në administrim shpërndarje nga kompania postare, si dhe ato që janë kthyer nga DHL-ja pas dorëzimit dhe marrjes së zarfave nga votuesi emigrant.
6-Numri i emigrantëve që rezultuan me adresa të pasakta, e që kërkuan saktësim pas përfundimit të afatit të regjistrimit në platformën PER.
7-Kopje të manifestit të dërgesave ditore për zarfat e dërguara e ato të mbërritura, të njëhsuara me origjinalin.
8-Procesverbalet mbi gjendjen numerike dhe fizike të dërgesave postare që DHL-ja ka raportuar në zonën doganore dhe ka administruar në ambientet e dedikuara postare. Kjo pikë parashikon dhe informacionin nëse ka pasur ndërhyrje në ndonjë rast nga ana e autoriteteve doganore apo policore mbi zarfat.
