Partia Demokratike ka reaguar sa i përket mesazhit të djeshëm në një studio televizive ku pretendohej se kreu i PD, Lulzim Basha i kërkonte gazetares që të pyeste kryeministrin Ramën nëse do të ishte i gatshëm të jepte dorëheqjen dhe t’ja linte vendin atij.
Ata e kanë cilësuar atë një akt të turpshëm të atyre që duan të fshehin keqmenaxhimin e krizës. PD ka kërkuar të zbardhet ai që ata e quajnë “skandal kriminal”.
Ata shigjetojnë kryeministrin Rama duke i thënë “të ndalë menjëherë lojërat e pista dhe luftën politike me mesazhe fallso, njerëz fallso dhe propagandë të skaduar kundër opozitës”.
Reagimi i Partisë Demokratike
Dje në emisionin Open është dërguar një mesazh i sajuar me pyetje drejtuar Edi Ramës nga gjoja numri i telefonit të Kryetarit të Partisë Demokratike, Lulzim Basha. Ky mesazh i sajuar në mënyrë të paligjshme është një akt i turpshëm i atyre që duan të fshehin keqmenaxhimin e krizës.
Ata që sajojnë mesazhe në emër të kryetarit të opozitës, duke ndërhyrë në mënyrë të paligjshme në telefonin e gazetarëve, mund ta bëjnë këtë akt të rrezikshëm me çdo qytetar. Ne do t’u kërkojmë organeve përgjegjëse të zbardhin këtë skandal kriminal për të zbuluar me prova autorët dhe për ti ndëshkuar ata sipas ligjit.
Edi Rama duhet të ndalë menjëherë lojërat e pista dhe luftën politike me mesazhe fallso, njerëz fallso dhe propagandë të skaduar kundër opozitës. Ai duhet t’u kthejë sot shqiptarëve lekët e taksave për të përballuar krizën e bukës që po thellohet nga mbyllja e vendeve të punës.
Thirrja jonë për Edi Ramën është: Mirato urgjentisht paketën e ndihmës! Shqiptarët kërcënohen nga rreziqe të mëdha. Ndal sulmet politike, fillo bëj punën për të cilën paguhesh! /Opinion.al
