Një objekt dykatësh që shërben kati i parë si biznes dhe kati i dytë për banim u shemb sot në Laprakë, pranë rrethrrotullimit të sheshi Shqiponja. Objekti ishte në listën e shembjeve për ti hapur rrugë ndërtimit të Unazës së Madhe. Policia ndërhyri me forcë pasi pronarët e shtëpisë pretendonin se objekti nuk duhet të shembet pa dalë vendimi i gjykatës.
Deputetët e PD ishin në mbështetje të banorëve dhe ndoqën nga afër aksionin e IMT-së që pati edhe inicidente. Më pas PD në një deklaratë për mediat tha se Rama ka shembur shtëpinë e Bajram Nelës, i afërm i poetit të pushkatuar Havzi Nela.
“Forcat e IMT-së, Policia Bashkiake dhe forcat “Shqiponja” vendosën sot të përdorin forcën për të nxjerrë me forcë një familjeje nga shtëpia dhe për ta prishur atë demonstrativisht. Familja që ishte vendosur të bëhej shembull e para ishte ajo e Bajram Nelës. Nisja e prishjeve me forcë të shtëpive me familjen e Bajram Nelës, një i afërm i Havzi Nelës, poetit që u var në 1988 në sheshin qendror të Kukësit nga diktatura komuniste, të kujton jo vetëm firmën e Kristaq Ramës në atë varje, por flet edhe për marrëdhënien që Edi Rama do të vendosë sot me protestuesit. Për banorët e Unazës së Re, Laprakës, Shkozës dhe shumë zonave të tjera informale, prishja e banesës së Nelëve është një mesazh se me ta nuk do të ketë negociata, por do të flitet vetëm me gjuhën e forcës”, thuhet në reagimin e PD-së.
*Në foto Bajram Nela
