Deputeti i Partisë Demokratike, Luçiano Boçi, në një postim në Facebook, ka denoncuar një tjetër të ndërtimit të një dige në kanionin e Holtës. Në postimin e tij Boçi shkruan se, në kanionin e Holtës në bashkinë Gramsh do të ndërtohet një digë. Sipas tij për këtë nuk ka pasur asnjë konsultim me banorët.
Postimi i plotë:
ALARMI QË VJEN NGA HOLTA
Ndërtimi i një dige në kanionin e Holtës në bashkinë Gramsh, një ndër bukuritë epike të natyrës shqiptare, ka revoltuar komunitetin e kësaj zonës.
“Dhuratën” ia ka bë peshqesh Gramshit, deputeti dikur i zonës, ministri i sotëm Damian Gjiknuri. I cili dikur premtonte që do ta kthente zonën, për shkak të bukurisë së rrallë natyrore, në destinacion turistik!?
Sot ai po ekzekuton me një firmë të vogël, për interesa të ulta financiare atë që Zoti ja ka falë Gramshit me zemër të madhe. Vendimi është marrë pa asnjë konsultim publik, asnjë kriter natyror e turistik.
Përpos turp, një vendim i tillë vjen era klientelizëm e korrupsion. Ai është i papranueshëm dhe duhet të anullohet.
