Teksa Operacioni Forca e Ligjit këtë të mërkurë ka dalë me emra të rinj, sa i përket verifikimit të pasurisë, Partia Demokratike nga ana tjetër pyet pse nuk janë në listë këta emra.
Ish-deputeti demokrat Flamur Noka, në një konferencë për mediat pyeti se pse ligji anti-KÇK nuk zbatohet Ermal Hoxhën?
“Pasuritë e Ermal Hoxhës, bashkëpunëtorit të Olsi Ramës për ngritjen e laboratorit të kokainës në Xibrakë, nuk duhet të mbeten të paprekshme. Financieri i grupit të strukturuar kriminal, që, menjëherë pas ardhjes në pushtet të Edi Ramës, ngriti laboratorin e parë të kokainës në Shqipëri, nuk duhet të ketë mbrojtjen e Olsi Ramës nga ligji i Edi Ramës. Fatkeqësisht, rastet si ky i Ermal Hoxhës, Saimir Tahirit apo Taulant Ballës me mikun e tij trafikant droge, që merr tendera publikë tregojnë sesa thellë e ka kriminalizuar Edi Rama politikën dhe vendimmarrjen”, tha Flamur Noka.
Ligji Special u miratua në formën e një akti normativ nga Qeveria të premten e shkuar dhe u prezantua si një ndërhyrje e domosdoshme për të goditur pasuritë e krimit të organizuar si dhe pjesëtarëve të tij që i kanë shpëtuar Drejtësisë në forma të ndryshme.
Kjo ndërhyrje ka shkaktuar debate të shumta dhe nuk kanë munguar kritikat se masat e ashpra të parashikuara rrezikojnë të cënojnë disa të drejta dhe liri themelore.
Ligji u vlerësua nga ambasada amerikane në Tiranë dhe Delegacioni i Bashkimit europian si përpjekje e shtuar e Qeverisë për të trajtuar fenomenin e krimit të organizuar, por të dyja palët theksuan se do ta ndjekin nga afër zbatimin e tij./ Opinion.al
