Partia Demokratike mblodhi këtë të mërkurë grupin parlamentar. Në nisje, pati një fjalë nga kryetari i partisë, Sali Berisha. Ai u ndal tek protesta që selia blu do të zhvillojë më 8 Shkurt. Sipas ish-kryeministrit, në këtë ditë opozita do të tregojë të gjithë fuqinë në mbrojtje të votës së lirë dhe për zgjedhjet e lira dhe të ndershme.
“Data 8 është dita në të cilën ne tregojmë të gjithë fuqinë tonë në mbrojtje të votës së lirë dhe për zgjedhje të lira dhe të ndershme. Ju dhe qytetarët e dëgjuan autopsinë që i bëri klanit Rama, Ballukut dhe Dumanit, Arben Ahmetaj në një vërtetësi të jashtëzakonshme, me dokumente”, tha Berisha.
Para deputetëve demokratë, Berisha u shpreh se kryeministrit Edi Rama po i bëhet “diskretitim i madh kombëtar e ndërkombëtar”. Po ashtu, ai shtoi se shqiptarët janë të bindur se pas zgjedhjeve, në pushtet do të jetë Partia Demokratike. Për Berishën, qeverinë po e refuzon edhe diaspora.
“Emigracioni po i refuzon masivisht. Nuk janë në gjendje të filmojnë takimet e tyre sepse janë të dështuara të gjitha”, tha Berisha./tvklan.al
