Të premten në orën 18:00 do të mblidhet Këshilli Kombëtar në selinë e PD-së.
Në një njoftim drejtuar anëtarëve, kreu i Këshillit Kombëtar të demokratëve, Edi Paloka thotë se në mbledhje do të diskutohet për situatën politike dhe hapat që do të ndërmarri PD në vazhdim.
“Të nderuar anëtare të Këshillit Kombëtar, ditën e premte dt 27 tetor, ora 18.00 në selinë e PD do të mblidhemi për të diskutuar situatën politike dhe hapat që do të ndërmarrim në vazhdim”-thuhet në njoftim.
Kujtojmë se kjo mbledhje vjen në kohën kur ish-kryeministri Sali Berisha është vënë nën hetim për çështjen e privatizimit të kompleksit Partizani.
Për këtë çështje, Sali Berisha është nën masën detyrim paraqitje dhe nuk mund të largohet nga vendi. Sipas SPAK, ish-kryeministri me veprime konkrete ka ndikuar në miratimin e ligjeve apo akteve nënligjore të cilat u përshtatën me kërkesat e 5 pronarëve, mes të cilëve përfitues ishte dhe dhëndri i tij, Jamarbër Malltezi.
Ndërkohë, Malltezi dyshohet se ka konsumuar veprën penale të “Korrupsioni pasiv të funksionarëve të lartë shtetërore ose të zgjedhurve vendorë”, kryer në bashkëpunim me Berishën, pasi në marrëveshje me këtë të fundit, duke shfrytëzuar pushtetin e ish-kryeministrit, ka arritur të marrë përfitime të parregullta./Opinion.al
