Partia Demokratike ka bërë publike një listë me 130 emra zyrtarësh të cilët sipas saj rezultojnë me rekorde kriminale dhe që kanë qenë të dënuar në Shqipëri dhe jashtë saj.
Për këtë PD i ka kërkuar ministrit të Brendshëm që të bëjë verifikimet.
“Materialet që disponon Ministria e Brendshme, apo Drejtoria e Përgjithshme e Policisë së Shtetit që vërtetojnë se shtetasit e përfshirë në listën e mëposhtme janë dënuar me vendim gjykate në Republikën e Shqipërisë apo të gjykatave të shteteve të tjera, duke specifikuar numrin e vendimit të gjykatës, gjykatën që ka marrë këtë vendim, llojin e veprës penale për të cilin është dënuar nga gjykata, koha kur është dënuar dhe masën e dënimit të shoqëruara me fotokopjen e vendimit të gjykatës”, thuhet në kërkesën e PD-së.
Në listën e drejtuesve të institucioneve, në pushtetin qendror dhe atë lokal, bie në sy se Partia Demokratike ka kërkuar informacion të detajuar edhe për Klement Balilin, i cili ka qenë drejtor i Transportit Rrugor në Sarandë.
Po ashtu, në kërkesën e demokratëve është listuar dhe Klodian Xhelili, djali i ish kryebashkiakut të Dibrës, Shukri Xhelili, i cili sipas PDsë është punonjës i po kësaj bashkie.
Në shkresën zyrtare, figurojnë emra drejtuesish të Policisë së Shtetit, Tatim Taksave, drejtues të autoriteteve portale, kryetar njësish administrative, deri tek specialistë të thjeshtë të ministrive.
