Partia Demokratike deklaron se ka përkrahur çdo masë agresive kundër përhapjes së koronavirusit, por ajo thotë se vendimi i fundit i qeverisë për qarkullimin e makinave nuk i shërben këtij qëllimi.
Në reagimin e saj PD kërkon që karantina totale të vijojë për 14 ditë dhe mos të lejohet qarkullimi i automjeteve në orare të caktuara sic njoftoi dje kryeministri Rama.
Në komunikimin e djeshëm Rama tha se nga e hëna, automjetet private do të lejohen të qarkullojnë deri në orën 8 të mëngjesit dhe nga ora 16:00-17:00 vetëm për ata që do të shkojnë në punë. Por sipas PD ky është një vendim “gjysmak”
“Në kushtet kur qeveria nuk përmbush detyrimin ligjor që të dezinfektojë rrugët, parqet apo pallatet, qytetarët duhet të qendrojnë në shtëpi sa më shumë të jetë e mundur. Kjo masë duhet të shoqërohet menjëherë me miratimin nga qeveria të paketës së masave për pasojat social-ekonomike të krizës”, thuhet në reagimin e PD.
Më tej ata propozojnë miratimin e një pakete social-ekonomike për tu ardhur në ndihmë qytetarëve dhe për ti mbrojtur ata ekonomikisht gjatë izolimit.
PD propozon rimbursimin e bizneseve, rimbursimin e pagës së punonjësve dhe ndihmën për të papunët dhe familjet në nevojë. /Opinion.al
