Partia Demokratike kërkoi sot përjashtimin me 10 ditë nga punimet e Kuvendit, të deputetit socialist Pjerin Ndreu. Shkak u bë një sherr në Komisionin e Sigurisë, ku Ndreu i drejtohej deputetit Ervin Salianji me fjalët: “Do hash dajak; Ti do rrahur”, etj.
Sipas PD, thirrjet për përdorimin e dhunës dhe fyerjeve janë të papranueshme në jetën parlamentare.
Sherri në komision
Ervin Salianji e pyeti ministren Xhaçka: “A ju duhet më shumë buxhet për të kontrolluar ish-repartet ushtarake, që përdoren për magazinim droge? A ju duhet më shumë buxhet për të vendosur në funksion radarët?!”
Por, përgjigjen pyetjes ia ka kthyer ndryshe, Paulin Stërkaj: Je bilbil mali! Se vetëm për të folur ke ardhur.
Kurse, Pjerin Ndreu, pa mikrofon, iu kthye Salianjit: Mos i provoke të gjithë se do të hash dajak! Ti do rrahur!
Paulin Stërkaj ka vazhduar, duke i kujtuar Salianjit:… Unë bëj mundje, boks edhe karate. Mos më bëj mua presion!
Pjerin Ndreu nga ana tjetër iu ka kthyer deputetit demokrat: Rri more urtë se je bërë provokator i keq! Rri more urtë, nuk e shikon çfarë është bërë në të kaluarën?!
Salianji ia ka pritur: Nuk pyes dhe s’kam frikë nga asnjë bandit!
