Kërkesa e Partisë Demokratike të drejtuar nga Alibeaj për çregjistrimin nga gara elektorale të kandidatit të PS-së Qerim Ismailaj, nuk është marrë në shqyrtim nga Komisioni i Ankimimit dhe Sanksioneve (KAS).
PD kërkoi çregjistrimin e Ismailajt me argumentin se Ismailaj është i dënuar për falsifikim dokumentesh.
Më 2 Shkurt të këtij viti, kryebashkiaku i Mallakastrës është shpallur fajtor për veprën penale “Falsifikimi i vulave, i stampave ose i formularëve”. Pas disa procedurave nga ana e gjykatës, në përfundim u vendos që dënimi me 4 muaj burg t’i konvertohej Ismailajt në 40 orë pune për interes publik. Nga ana tjetër SPAK kërkoi që kryebashkiaku i Mallakstrës të dënohej me 1 vit heqje lirie.
Ai ka deklaruar më herët se do të apelojë vendimin pasi është i pafajshëm dhe se nuk do të japë dorëheqjen.
Ismailaj u kallëzua në SPAK nga Partia Demokratike, e cila pretendon se nga evidenca e shërbimit të oficerit të policisë në 30 Janar të 1999, Ismailaj ishte thirrur sipas ligjit për t’u paraqitur në gjykatën e Kios në Greqi, për veprën penale të përleshjes, ku ka marrë dijeni për akuzën.
Rezultatet e verifikimit nga dekriminalizimi, Prokuroria e Përgjithshme ia dërgoi gjetjet KQZ më 2 Korrik 2021, e cila vendosi ta lërë në detyrë Qerim Ismailajn me argumentin se dënimi penal dhënë në Greqi në Shqipëri është dënim vetëm me gjobë.
