Më shumë se dy javë pas grabitjes së rreth 1 milionë eurove në aerportin e Rinasit, Partia Demokratike është shprehur sërish mbi këtë argument duke akuzuar policinë si bashkëpunëtore në këtë ngjarje. Në një konferencë për shtyp, deputeti Alban Zeneli, u shpreh se ai ka “prova që dëshmojnë dhe një herë, inkrimimin tronditës që ka ndodhur në policinë e shtetit”.
“Më 30 qershor ra çdo standard i sigurisë publike e sigurisë kombëtare në vend, kur në mesdite aeroporti i vetëm ndërkombëtar që kemi, u pushtua nga një grup i armatosur e me maska. Grabitja e miliona eurove, dhe tronditja që kjo ngjarje shkaktoi në mbarë opinionin publik, u shoqërua nga përpjekjet e Edi Ramës e Saimit Tahirit për ta larguar përgjegjësinë nga vetja. Sot që kanë kaluar 18 ditë nga sulmi me armë në pistën e avionëve në territorin më strategjik të vendit, ende askush nuk ka mbajtur përgjegjësi, dhe Rama e Tahiri po luajnë çdo gur që kanë në dorë për të dalë të larë nga kjo histori. Gjithkush e di se në grabitjen me armë e me maska në shkallët e avionit, pati bashkëpunim të policisë, të shefave të pikave kyçe të aeroportit të Rinasit e më lart”, u shpreh deputeti i PD- së.
“Është provuar se policia edhe pse gjendej në pistën e avionëve, edhe pse kishte prezencë të shtuar pas sulmeve në aeroportin e Stambollit, nuk reagoi ç’ka bëri të mundur grabitjen dhe largimin e qetë të autorëve, asnjë prej të cilëve ende nuk është ndaluar. Partia Demokratike do të publikojë nesër fakte dhe të dhëna që vërtetojnë katërcipërisht bashkëpunimin e njerezve të Saimir Tahirit në polici, në këtë grabitje e sulm të armatosur në Rinas. Prova që dëshmojnë dhe një herë, inkrimimin tronditës që ka ndodhur në policinë e shtetit me Ramës e Tahirin në këto 3 vite. Nesër, prova e fakte, foto dhe filmime për përfshirjen e njerëzve të Tahirit në grabitjen më të rëndë të këtyre viteve në Shqipëri”, ka deklaruar Zeneli.
