Partia Demokratike ka depozituar një kallëzim penal për projektin e Unazës së Re, pasi sipas saj, në këtë projekt ka akte korruptive.
PD i ka kërkuar Prokurorisë që të nisi sa më shpejtë hetimet dhe punimet tek Unaza e Re të ndërpriten deri në përfundimin e plotë të hetimeve.
Ish-deputeti i PD, Klevis Balliu është shprehur se në këtë projekt; “bëhet fjalë në jetë njerëzish, ata po shkatërrohen, po goditen për shkak të një projekti korruptiv”,
“Ky është mali me dokumente që janë prova dhe fakte që ky projekti ka vetëm një qëllim kullat e jo rrugët, vjedhjen e jo rrugët. Si ka mundësi që kompania që është aktualisht në hetim te loti 2 ka fituar tenderin te loti 1 i të njëjtit projekt? kjo prokurori duhet menjëherë të nisë hetimet e të pezullojë punimet te Unaza e Re. Këtu po bëhet fjalë në jetë njerëzish, ata po shkatërrohen, po goditen për shkak të një projekti korruptiv”, tha Balliu jashtë Prokurorisë.
Ndërkohë, Çlirim Gjata është shprehur se; “Shkeljet janë kaq të rënda dhe kaq shumë i kanë futur duart në këtë mega-korrupsion, vetëm vullneti politik i qeverisë mund ta bëjë këtë prokurori që të mos hetojë e mos të vendosë përpara përgjegjësisë, kaq flagrante janë shkeljet. Të bësh gjithë këtë projekt korruptiv, të nxjerrësh njerëzit jashtë, vetëm e vetëm për të fituar troje të cilat shkojnë deri në 900 milionë euro, pastrim parash të krimit të organizuar dhe pisllëqeve të tjera ku janë përzier qeveritarë, kompani, administratorë, projektues. Është një megakorrupsion dhe ata njerëz që dolën në protestë e kanë nxjerrë zbuluar. Vetëm qeveria është ajo që e duron këtë prokurori në këto shkelje kaq flagrante dhe të qarta që të mos fillojë hetimet dhe t’i vërë para përgjegjësisë. Urgjent duhet të ndërpriten punimet. Prokurori duhet të shkojë vetë atje dhe të vendosë pezullimin e punimeve dhe të mbahet përgjegjësi për atë çfarë po ndodh”,-/ Opinion.al
