Ditën e sotme, Partia Demokratike, akuzoi nëpërmjet deputetit Gent Strazimiri, anëtarin e Këshillit të Lartë të Prokurorisë, Bujar Sheshi, se dikur ka qenë bashkëpunëtor i Sigurimit të Shtetit, gjatë regjimit komunist.
Partia Demokratike publikoi disa dokumente që sipas Selisë Blu, vërtetonin këtë fakt, ndaj për këtë arsye prokurori Sheshi nuk duhet ta kalonte procesin e Vettingut.
Por këto dokumente janë hedhur poshtë nga vetë prokurori Sheshi.
Në një reagim publik Bujar Sheshi i i ka cilësuar akuzat si shpifje.
Në një bisedë të shkurtë telefonike me agjencinë investigative BIRN, Sheshi tha se do të jepte një reagim më të plotë kur të njihej me të gjitha dokumentet, por nuk pranoi të kishte qenë bashkëpunëtor i Sigurimit
“Është shpifje, nuk kam qenë kurrë anëtar i Sigurimit të Shtetit,” tha ai.
Sheshi u zgjodh anëtar i Këshillit të Lartë të Prokurorisë më 11 dhjetor 2018.
Ai ka një karrierë të pasur në drejtësi.
Më 26 tetor 2018, Kryeprokurorja e Përkohshme Arta Marku, i kërkoi Autoritetit për Informim mbi Dokumentet e ish-Sigurimit të Shtetit, një vlerësim mbi figuruën e prokurorit Sheshi.
Më 22 Janar nga vlerësimi doli se z. Sheshi rezulton në ish dokumentet e ish-sigurimit si bashkëpunëtor në kohën kur ka qenë nxënës në Gjimnazin “Petro Nini Luarasi” në Tiranë, por nuk ka dokumente mbi rolin e tij.
Vlerësim i cili është firmosur nga kryetarja Gentiana Sula, anëtarët Altin Hoxha dhe Simon Miraka, ndërsa është kundërshtuar nga Dr. Marenglen Kasmi.
