TIRANË- Teksa debati në parlament u ndez nga Berisha, Balla, Braçe e Topalli, ka folur deputeti demokrat Astrit Patozi i cili tha se sot aps 5 vite nga ngjarja politika nuk ka më moral të përsërisë të njëjtat fjalime.
“Do përpiqem të ndihmoj seancën të dalë nga kjo temë, se ky është debat i panevojshëm, e kemi bërë njëherë bashkë dhe e kemi ezauruar dhe nuk ka ndodhur asgjë më tepër se 4 viktimat e 21 janarit.
Sot vlente për ata që kanë ndryshuar parti, koalicion apo qëndrim për atë që ndodhi, po jo për ne të tjerët, dhe nuk kam dëgjuar asnjë që t’u përkasë kësaj kategorie e të flasë.
Ky është një debat politik i mbyllur mes nesh, por ka edhe elementin e vet juridik, e politika hesht kur flet gjyqësori, askush nuk e pengon drejtësinë të flasë”, tha Patozi. Sipas tij “Por ka edhe element moral, dhe morali juaj dhe morali i debatit është mbyllur më 1 prill kur firmosët koalicionin e turpit.
Por ju e përdorni këtë për të larguar vëmendjen nga problemet që ka sot vendi a thua se po na kompleksoni ne për 4 të vrarët. Ju mund të thoni për ne që kemi vrarë dhe Qemal Stafën më 5 maj, por kjo nuk ju ndihmon as që përmes 21 janarit të zaptoni drejtësinë që ka mbetur, se e keni kthyer reformës si fe, apo ideologji”.
