Ministria për Evropën dhe Punët e Jashtme e Shqipërisë thotë se po ndjek me vëmendje fenomenin e pasivizimit të adresave të shqiptarëve në Luginën e Preshevës, veçanërisht në Medvegjë.
Ministria thotë se ky veprim përbën një shkelje të të drejtave të njeriut dhe të standardeve për mbrojtjen e pakicave, duke privuar shqiptarët nga qasja në shërbime bazë dhe ushtrimi i të drejtave të tyre themelore.
“Pasivizimi i adresave nuk është një çështje thjesht ligjore, por ka pasoja mbi jetën e përditshme të shqiptarëve në këtë rajon, duke cënuar të drejtat dhe barazinë e tyre. Ministria ka adresuar dhe do të vazhdojë të adresojë këtë çështje në dialogun me autoritetet serbe, si dhe në forume ndërkombëtare”, thuhet në reagimin e Ministrisë për Punët e Jashtme.
Ministria thotë se Shqipëria do të vazhdojë të kërkojë mbrojtjen e të drejtave të shqiptarëve në Luginën e Preshevës, në përputhje me standardet ndërkombëtare për të drejtat e njeriut dhe pakicave.
Ky njoftim i Ministrisë merr shkas nga rasti i refuzimit nga Gjykata Kushtetuese e Serbisë i ankesës së një shqiptari nga Medvegja për kthimin e adresave të shqiptarëve.
Pasivizimi nënkupton fshirjen e qytetarëve prej adresave ku kanë qenë të regjistruar.
