Megjithëse vetë lojtari shpresonte shumë, përfundimisht De Biasi nuk e ka përfshirë në listën për në Euro 2016.
Megjithatë i kontaktuar nga “Gazzetta dello Sport”, tekniku kuqezi nuk ka kursyer elozhet për Rey Manajn, të cilin duket se ka dashur ta marrë me të mira: “Ai mbetet një sulmues me shumë potencial, i cili e sheh portën si pak të tjerë. Zotëron cilësi fizike të mëdha, por nuk di nëse mund të konsiderohet një sulmues i parë”. Ndër të tjera nuk ka kursyer as krahasime me një mit të së kaluarës interiste dhe të futbollit italian: “Më kujton shumë Roberto Boninsenjën, për mënyrën e të luajturit dhe personalitetin që zotëron. Unë në moshën e tij isha në dhomë me një tjetër emër të madh të futbollit si Mazzola dhe nuk kisha as kurajën t’i fikja dritën gjatë natës. Gjithsesi, Rei është ndryshe sa i takon personalitetit”.
Ndërkohë duke u kthyer te debutimi i Manajt me fanellën kuqezi, De Biasi ka rrëfyer edhe një prapaskenë kurioze: “Përpara ndeshjes me Kosovën i kërkova të hynte në fushë, por të mos bënte më shumë sesa kishte mundësi. Po ai m’u drejtua: ‘Mister, unë do të shënoj’. Hyri, vrapoi dhe pas 12 sekondash, ia del të shënojë. E jashtëzakonshme!”.
Duket se me Manajn po përsëritet pak a shumë e njëjta histori si me Hysajn, kur ishte pikërisht De biasi që e bëri të debutojë në Oslo kundër Norvegjisë. Atëherë kur presidenti Duka i ishte drejtuar me fjalët: “Mister, je i çmendur?! Eshte vetem nje djalë 19-vjeçar’.
Ndërsa De Biasi pa iu dridhur qerpiku i ishte kthyer: “President, sikur të kisha 5 si ky…do t’i aktivizoja të gjithë’. E duke pasur parasysh se në çfarë niveli gjendet tani Hysaj, me siguri që edhe 19-vjeçari Manaj shpreson të jetë një ogur i mirë.
