Rikthehen fluturimet Stamboll-Tiranë, dy ditë pas tentativës për grusht shteti në Turqi. Në orën 08:25, avioni i nisur nga Stambolli prekun pistën e Aeroportit “Nënë Tereza”, duke sjellë edhe shqiptarët e parë që ishin bllokuar prej dy ditësh në Turqi.
Por si e kanë përjetuar ata situatën e krijuar dhe çfarë ka ndodhur në Aeroportin “Ataturk” të Stambollit? “Mua më ra shumë keq, sepse m’u desh të prisja dy net. Isha që natën e parë të panikut dhe terrorit në aeroport, personeli na u zhduk nga sytë. Dëgjuam vetëm krisma e bomba. Një natë qëndruam thuajse 24 orë në aeroport, pastaj na dërguan këta të kompanisë në hotel. Ne që u bllokuam te tranziti natën e parë u tmerruam”, thotë një pasagjere. “Kemi kaluar gjithë terrorin dhe panikun e atyre momenteve. Popullin dhe ushtrinë e kemi parë nëpër fotografi, por edhe i kemi filmuar.
Dje në drekë kisha edhe varrimin e tim ati, por nuk e kapa dot. Vij nga Londra dhe i lutem Zotit që mos t’ia shohë më bojën atij shteti”, thotë një tjetër pasagjer. Por ka pasur edhe nga ata, të cilëve nuk u është dashur të presin në aeroport, por që shqetësimin për atë po ndodhte e kanë përjetuar në qytet. “Njerëzit nuk dilnin jashtë sepse kishin frikën e një shtetrrethimi, u munduan thjesht të blinin gjerat bazë ushqimore”, shprehet pasagjerja tjetër.
“Gjëndja ishte shumë e vështirë andej, u stresuam dhe u frikësuam të them të drejtën”, tha një grua e moshuar. Aeroporti kryesor i Turqisë dhe një ndër nyjet lidhëse mes shumë vendeve, anuloi të gjitha fluturimet mesnatën e së premtes, kur grupe të ushtrisë tentuan të merrnin drejtimin e qeverisë me anë të një grushti shteti, për të rifilluar sërish punë rreth 12 orë më pas. /TCH/
