Duke nisur nga 15 qershori do të nisi të zbatohet ndryshimi i ri ligjor në kodin rrugor që parashikon dyfishimin e gjobave në këmbim të mos pezullimit të patentës për shtetasit e huaj.
Amendamenti u miratua pak javë më parë dhe tashmë është publikuar në fletoren zyrtare. Bëhet fjalë për pikën 3 të nenit 127 e cila ishte bërë problematike sidomos për shtetasit nga Kosova, që kapeshin në shkelje të rregullave. Sipas kësaj dispozite shtetasve të huaj mund ti merrej patenta dhe ata duhet të kalonin në një sërë procedurash burokratike të zgjatura për ta rimarrë atë.
Tashmë në këtë pikë janë bërë 2 shtesa, ku njëra parashikon konvertimin e masës së heqjes së lejes së drejtimit me dyfishim të gjobës.
Propozimi për këtë ndryshim ka ardhur nga deputeti Pjerin Ndreu i cili ka renditur në argumentimin e tij se ky ndryshim ndihmon në unifikimin e sanksioneve me vendet e BE, masa do të jetë lehtësuese për drejtuesit e mjeteve sepse do të shmangë procedura të zgjatura dhe shmang rastet e korrupsionit që mund të ndodhin në rastet kur bllokohet patenta. /Opinion.al
