E shtuna duket se ishte një ditë e tejet e nxehtë, si nga kushtet atmosferike, por mbi të gjitha në politikë. Presidenti Ilir Meta njoftoi se ka vendosur të shtyjë datën e zgjedhjeve vendore të 30 Qershorit.
Njoftimi i tij u bë pak përpara nisjes zyrtare të protestës së opozitës. Presidenti ka bërë të ditur vetëm anulimin e dekretit me anë të të cilit ai kishte shpallur 30 qershorit si datë, duke shpjeguar se “ditën e hënë, datë 10 qershor, në mëngjes, Institucioni i Presidentit të Republikës do të bëjë publikisht me dije të gjithë argumentet shteruese kushtetues, ligjorë dhe logjikë që çuan në marrjen e këtij vendimi”.
Në deklaratën e shpërndarë nga zyra e tij, Meta shpjegon arsyet e vendimit të tij. Sipas deklaratës, ky vendimi ka ardhur si pasojë e “shqetësimit të thellë për situatën kritike të krijuar në vend si pasojë e mos-reflektimit të asnjërës palë”, dhe se për këtë ai “ka patur parasysh domosdoshmërinë e ç’tensionimit urgjent të situatës dhe të rrezikut të përshkallëzimit të paparashikueshëm të konfliktit në vend, se ka marrë përgjegjësinë e lartë kushtetuese e institucionale, dhe i bindur se mbrojtja e parimeve kushtetuese është më e rëndësishme se çdo afat ligjor, si Kreu i Shtetit dhe duke iu përmbajtur betimit për t’i shërbyer ruajtjes me çdo kusht të stabilitetit, paqes sociale dhe unitetit kombëtar, dhe se ka vetëdijen e plotë se kushtet aktuale nuk mundësojnë zhvillimin e zgjedhjeve të vërteta, demokratike, përfaqësuese dhe gjithëpërfshirëse. Zgjedhjet e lira dhe të ndershme janë kriter kryesor i Kopenhagës dhe në kushtet aktuale, për mungesë përgjegjësie të të dy palëve, po shkojmë drejt votimeve një partiake. Në këtë mënyrë minohet çdo mundësi për çeljen e negociatave të anëtarësimit me Bashkimin Evropian, dëmtohet imazhi si vend anëtar i NATO-s dhe cenohet kryesimi i OSBE-në për vitin 2020”.
Në deklaratën e tij, presidenti fton “të gjithë aktorët e përgjegjshëm vendas dhe ndërkombëtarë të bashkojnë kontributet konstruktive për rivendosjen urgjent të dialogut të pazëvendësueshëm politik dhe për gjetjen e një zgjidhjeje të shpejtë dhe që i shërben të ardhmes evropiane të Shqipërisë”.
Reagimi i Edi Ramës
Tani mora këtë letrën e më thotë që presidenti shfuqizoi dekretin për zgjedhjet. Përsëri gabim , përsëri unë po iu them zgjedhjet do bëhen në 30 qershor. Nuk jam i befasuar, e prisja edhe këtë! Dhe nuk është asgjë tjetër veçse mbyllja e një rrethi të një plani të bërë me kohë për një arsye të vetme. Nuk kërkohet shtyja e zgjedhjeve, kërkohet marrja zvarrë e kësaj qeverie dhe varrimi i reformës në drejtësi. Ky është thelbi, as gjë tjetër. As qeverinë nuk e marrin do zvarrë, as reformën.
Ne në 30 qershor do të bëjmë zgjedhjet, nuk janë të partive, nuk janë të presidentit po të popullit shqiptar. Plaku i marrë, Saliu që i ka mbledhur të gjithë këta kokrra që nga Ilir Meta, Lulzim Basha, Monika Kryemadhi e i përdor si tespie të plakut merre. Mbajeni mend ca po iu them, zgjedhjet do bëhen. Mbajeni mend! Ato tespie do shpërbëhen nga duart e plakur dhe kokrrat do shpërndahen sa andej këtej. Pastaj me kokrrat me gunga do merret drejtësia. Gabojnë shumë me këto lëvizje që bëjnë se unë jam gjithmonë tre lëvizje më përpara. Asnjëherë deri më sot nuk jam befasuar.
Reagimi i Lulzim Bashës
Mirë se keni ardhur në bashkimin më të madh popullor që ka njohur Shqipëria. 6 netë më parë u zotova para jush se nuk kisha më fjalë dhe arsye për fjalë, ndaj më lejoni të shpjegoj para jush dhe gjithë shqiptarëve pse po e marr fjalën para jush dhe gjithë shqiptarëve, arsyen pse po e marr fjalën sot. Arsyeja është sepse kjo javë e mbushur me zhvillime të jashtëzakonshme në Shqipëri, në Gjermani, në Europë, të cilat janë të lidhura drejtpërdrejt me fatin e vendit tonë, me rrugën tonë drejt Europës, kanë marrë një kthesë. Ndaj më lejoni ta nis duke ju falënderuar ju vëllezër dhe motra që jeni forca e pandalshme e ndryshimit që po vjen.
Ju jeni fuqia, ju jeni forca. Në këto momente që po flas, ashtu siç e keni dëgjuar, falë vendosmërisë tuaj të pathyeshme falë bashkimit më të paparë të mendjeve e zemrave të shqiptarëve të lirë, presidenti i republikës ka marrë vendimin për anulimin e 30 qershorit, datës së planifikuar nga regjimi kriminalo autokratik i bands së Edi Ramës për të ekzekutuar krimin e shëmtuar elektoral, për të kapur përmes një procesi monist antikushtetues, anti-elektoral, antiligjor dhe kriminal, pushtetin vendor. Vëllezër dhe motra kjo është vetëm rezultat i forcës tuaj të pathyeshme, i qëndresës tuaj i besimit tuaj të palëkundur tek vlerat evropiane, të lirisë, të demokracisë, të dinjitetit.
Por çfarë ndodh tani?
Të vetmen lëvizje që mund të bënte mazhoranca qeverisëse ishte në këtë situatë ishte shkarkimi i Presidentit. Por duket se kjo gjë nuk realizohet dot në kushtet ku ndodhet vendi.
Sipas Kushtetutës së Republikës së Shqipërisë, Presidenti i Republikës nuk ka përgjegjësi për aktet e kryera në ushtrim të detyrës së tij, dhe me këtë kuptohet pikërisht mungesa e përgjegjësisë politike. Kushtetuta parashikon përgjegjësinë juridike. Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë, sipas procedurës së parashikuar në nenin 90, pika 2 dhe 3.
Në nocionin “krim i rëndë” hyn në radhë të parë krimi i tradhtisë ndaj atdheut. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra. Në kushtet ku ndodhet Shqipërisa, pas refoemës në drejtësi vendi nuk ka Gjykatë Kushtetuese.
Po ashtu kur Presidenti i Republikës është në pamundësi të përkohshme për të ushtruar funksionet e tij ose kur vendi i tij mbetet vakant, neni 91 i Kushtetutës parashikon se Kryetari i Kuvendit zë vendin dhe ushtron kompetencat e tij. Në rast se Presidenti nuk mund të ushtrojë detyrën për më shumë se 60 ditë, Kuvendi, me dy të tretat e të gjithë anëtarëve, vendos dërgimin e çështjes sërish në Gjykatën Kushtetuese, e cila vërteton përfundimisht faktin e pamundësisë.
Në rast të vërtetimit të pamundësisë, vendi i Presidentit mbetet vakant dhe zgjedhja e Presidentit të ri fillon brenda 10 ditëve nga dita e vërtetimit të pamundësisë. Tani na mbetet vetëm të presim dhe të shikojmë zhvillimet e ditëve në vijim!/ Opinion.al
