Dy ditë pas tragjedisë në qytetin Koçani me 59 të vdekur dhe mbi 155 të plagosur në Maqedoninë e Veriut në spitale po kujdesen për kurimin e të plagosurve. Ndërsa autoritetet po punojnë për zbardhjen e shkaqeve.
Gjendja e pacientëve të shtruar në spitale është relativisht e qëndrueshme, vuri në dukje ministri i Shëndetësisë Arben Taravari, duke nënvizuar se në klinikat e vendit janë shtruar 84 pacientë ndërsa 51 të tjerë janë dërguar jashtë vendit
“Gjendja e pacientëve është relativisht stabile, fatmirësisht asnjë prej pacientëve nuk ka pas ndonjë farë komplikimi. Deri tani në klinikat e Shkupit ka 84 pacientë, 51 pacientë janë jashtë vendit. Në Turqi janë 9 pacientë, në Bullgari 14, në Greqi 5, në Serbi 17, në Hungari 2 dhe në Rumani 4. Sot do të niset edhe një fluks i pacientëve në Slloveni 4, në Kroaci 4, në Austri 6 dhe në Beograd 12 pacientë të tjerë”, ka deklaruar Arben Taravari, ministër i Shëndetësisë. Përveç që një numër i konsiderueshëm i të lënduarve është dërguar për mjekim jashtë vendit, nga sot në Maqedonin e Veriut kanë filluar të arrijnë edhe ekipe mjekësore nga jashtë
“Sot mendoj se situata është nën kontroll, kanë arritur mjek nga disa shtete tjera. Do ti shpërndajmë nëpër Klinikat ku ka nevojë që të punojnë bashke me mjekët tanë dhe ti shpërndajnë përvojat e tyre”, është shpreh Taravari.
Të 59 trupat e pajetë janë sjellë në Institutin e Mjekësisë Ligjore, ku po kryhet autopsia dhe identifikimi i viktimave për të përcaktuar shkaqet e sakta të vdekjes ka konfirmuar drejtori Aleksandar Stankov. Ai njoftoi se po punohet në mënyrë të intensifikuar që familjarët t’i marrin trupat e viktimave brenda javës.
“Mbrëmë ka filluar autopsia dhe procesi për identifikim dhe puna është në vijim e sipër. Punojmë me shpejtësi sa është e mundur që familjarët të mund t’i marrin trupat e viktimave”, deklaroi Aleksandar Stankov drejtor i Institutit të mjekësisë ligjore.
Ministri i Brendshëm Pançe Toshkovski ka zbardhur detaje të reja lidhur me masat që ndërmarrin organet e rendit për të zbardhur rastin e tragjedisë në Koçan ku humbën jetën 59 persona. Toshkovski tha, se fishkezjarrët që dyshohet se shkaktuan zjarrin i ka sjellë grupi muzikor DNK ndërsa personi i cili ka qenë përgjegjës për t’i ndezur fishekzjarrët ka ndërruar jetë.
“Janë arrestuar 13 persona, shitësi i biletave, 4 pjesëtar të sigurimit, pronari i diskotekës, disa inspektor si dhe një person tjetër që ndërlidhet me ngjarjen. Ndaj 11 personave është shqiptuar masa e paraburgimit. Për mjetet piroteknike do të dorëzohet raport në prokuroi. Janë konstatuar disa parregullsi në kuadër të objektit që është shfrytëzuar si diskotekë. Diskoteka jo që nuk ka pasur licencë por ka punuar në objekt të improvizuar”, ka deklaruar ministri i Brendshëm Panço Toshkovski, duke shtuar se klubi i natës në fjalë ka pasur vetëm dy aparate kundër zjarrit dhe se nuk ka pasur dyer për evakuim.
Në të gjitha diskotekat dhe klubet e natës që funksionojnë në Maqedoni do të realizohen kontrolle të rrepta që duhet të nxjerrin në pah të gjitha neglizhimet.
“Korrupsioni dhe krimi na sjellin në një situatë që t’i humbim jetën e të dashurve tanë. Ose do të ndryshojmë sistemin në këtë shtet ose nuk do të ekzistojmë. Gjithsecili që ndërlidhet me tragjedinë e Koçanit do të përgjigjet para organeve të drejtësisë”, ka thënë ministri Toshkovski.
Mickoski: Të gjithë ata që kanë gabuar do të përgjigjen
Kryeministri i Maqedonisë së Veriut Hristijan Mickovski ka thënë se tragjedia në Koçan mund të vlerësohet pamëdyshje si vrasje masive, që dikush e ka lejuar për të fituar para.
“Nuk do të ketë mëshirë, kushdo që të jetë, prej çfarëdo përkatësie etnike le të jetë dhe prej cilës do parti le të jetë. Ajo çfarë ka ndodhur është më shumë se krim, kjo është do të thosha vrasje masive, të cilën dikush e ka lejuar për para, për ryshfet, për korrupsion që të ndodh”, ka deklaruar kryeministri Hristijan Mickoski.
Sipas tijë gjendja me punën e klubeve të natës në Maqedoninë e Veriut është alarmante. Shumica e tyre punojnë pa licencë. “Erdhëm në përfundim se në vitin 2024 janë dhënë gjithsej 12 licenca për kabare, ndërsa ju mund ta paramendoni se sa klube punojnë në shtet. Vetëm 12 posedojnë licenca”, shprehet Mickovski.
Ngjarja tragjike në Koçan mblodhi qindra protestues në parkun e këtij qytetit, ku qytetarët mbanin pankarta ku shkruhej “Dhimbje e pashëruar”, “Nuk vdesim nga fatkeqësitë vdesim nga korrupsioni” dhe “Vrasja e rinisë është vrasja e ardhmërisë”. Në këto protesta po kërkohet edhe dorëheqje kolektive e të gjithë bartësve të institucioneve. Një ditë pas ngjarjes tragjike, dha dorëheqje të parevokueshme kryetari i komunës së Koçanit./DW
