Një ndër modelët më të kërkuar të markave të mëdha dhe një prej njerëzve të thjeshtë që u shndërrua në personazh sa hap e mbyll sytë, Jeremy Meeks, vitin e kaluar pushtoi mediat ndërkombëtare me tradhtinë e bujshme ndaj bashkëshortes, pasi u fotografua në jaht me të bijën e themeluesit të Top Shop-it, Chloe Green.
Edhe pse veprimin, në fillim modeli e justifikoi si një flirt, pas të cilit u “ndie shumë keq”, pas kërkesës për divorc nga bashkëshortja, nxitoi të hidhet sërish në krahët e biznesmenes dhe të vijojë i qetë lidhjen me të.
Pasi kanë kaluar disa muaj që Jeremy dhe Chloe jetojnë të lumtur dashurinë e tyre, modeli është fotografuar së fundi në një dyqan argjendarie duke kërkuar një unazë. Së bashku me mikun e tij, Vas J Morgan, Jeremy ka hyrë në një dyqan në Beverly Hills për të parë unazat.
Siç shkruan The Sun, lidhja mes dy të rinjve duket se po shkon shumë mirë, ndaj edhe Jeremy nuk e ka zgjatur më kohën e pritjes. Së bashku me Chloe, ai është parë gjithmonë në evente artistike, por edhe është shoqëruar gjithmonë nga ajo në çdo projekt apo kontratë të re që ka firmosur me markat e mëdha.
Për herë të parë bashkë, çifti u pa gjatë verës së shkuar, por Jeremy dhe 26-vjeçarja nuk u besuan për romancën e tyre, madje modeli u konsiderua edhe si një “grabitës parash”.
Megjithatë, vetë Jeremy insistoi në një intervistë të pak kohëve më parë se do të binte në dashuri me Chloe edhe sikur ajo të mos ishte e pasur.
Jeremy Meeks u bë i njohur në kohën kur vuante dënimin në burg për disa çështje të së kaluarës. Atëherë ishte i martuar me dy fëmijë. Pas një rastësie, e gjeti veten në faqet e revistave ndërkombëtare dhe në pasarelat më në zë në botë. Pasi filloi të ndjejë shijen e famës, ish-bashkëshortja tha se ai ndryshoi shumë. Kjo ishte edhe arsyeja, pas tradhtisë, e ndarjes së tyre vitin e kaluar.
